SECTIONS
Monday, August 19, 2019
SUPERBALITA CEBU

Sugilanon: Kaadlawon

Sugil

KAGANIHA dang nagmata si Wenda. Gitan-aw niya ang orasan sa iyang tokador diin mahimutang ang iyang mga pahumot. Gitan-aw pod niya ang iyang anino sa lingin nga salamin.

Maanyag siya ug seksi. Makabibihag ang hulma sa iyang bigot nga lawas kansang mga kurba gituyo paglalik sa bantogang eskultor sa Kinaiyahan aron pagdani sa mga kaliwat ni Adan. Alas kuwatro na sa kaadlawon. Gitan-aw niya pag-usab ang iyang anino didto sa salamin. Nagsul-ob siyag ‘negligee’, nipis nga sapot pangkatulog. Wa siya mag-bra; hinuon may panti siya nga itom nga nagtabon sa bahandi sa iyang pagka babaye. Naghiwasa siya kay wa pa moabot ang iyang gihulat.

Didto sa lawak nga kasikbit sa garahe gisudlay ni Apollo ang iyang kulungong buhok. Dayon gipunit ang Reksona gikan sa pasistor ubos sa salamin nga nagtbitay sa bungbong ug gipahid sa iyang mga ilok. Mipahiyom siya nga naghunahuna sa matahom linalang nga nahimo na niyang hinigugma, ang asawa sa iyang amo nga duha na ka tuig nga tua sa Quatar, nagtrabaho isip ‘accountant.’ Naghuwat karon kini kaniya didto sa iyang lawak. Migawas siya nga mainampingon aron dili makamatikod si Nang Esang, ang katabang sa balay, nga nahinanok sa kasikbit nga lawak sa kang Apollo.

Didto sa iyang lawak mitindog si Wenda ug nagpaso-paso. Karon ug unya, molingkod siya sa ngilit sa kama; unya moginhawag halawom. ‘Kadugay ba niya!’ mihagawhaw siya. Kusog nga nagbutokbutok ang iyang dughan sa kahinam. Una kining higayon nga naghuwat siya sa lalake dinhi sa ilang lawak sa iyang bana nga tua sa laing nasod. Misugot siya sa lalake nga iyang gihuwat nga moanhi sa iyang lawak karong kaadlawona human niya dawata ang gugma niini tungod sa kahaw-ang sa iyang kinabuhi nga atua sa halayo ang iyang bana.

Ang bunggalo may duha ka andana. Giliso ni Apollo ang ‘door knob’ sa pulta mayor sa ubos kay wa man kini gi-lock sigon sa ilang sabot. Pawong ang mga suga sa sala ug kusina sa ubos. Gihinay niya pagsera ang pulta mayor, Hinay siyang misaka sa itaas diin nagsiga pa ang suga sa lawak ni Wenda. Nagkang-a ang sera sa pultahan ug iyang gitulod paghinay. Nasugat sa iyang panan-aw ang makabibihag nga pamayhon ni Wenda nga naghigda sa kama nga mitutok kaniya. Mitindog kini ug misugat kaniya, Naggakos silag hugot kaayo, usag usa daw dili buot nga makahiplot sa ilang panaggakos. Unya nag-akob ang ilang mga ngabil nga pulos giuhaw sa gugma.

“Pagnga ang suga,” hunghong ni Wenda, Gituman ni Apollo.

“I love you, Wenda!” hagawhaw ni Apollo. “I love you so much!”

“I love you, too, Apollo!” ni Wenda. “Tagbawa ko sa akong kahidlaw kang David! Hulipi ang akong kamingaw kaniya!”

Unya nanghigda sila sa kama. Ug misapod ang tumang kahilom sa lawak niadtong taknaa sa kaadlawon. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph