DEAR Noy Kulas,
Tawga lang ko og Peks, 52 na. Biyudo na ko mga 10 years na kay namatay ang akong asawa sa cancer. Karon nagtrabaho ko as family driver after pud na-retrench ko sa among kompaniya.
Dinhi ni nagsugod ang akong problema. Ang akong mga amo magtiayon ug dunay mga anak. Negusyante silang duha. Ang lalake 76 years old, hinay na gamay molihok while ang babaye 55 years old pa. Dako sila og gap sa ilang edad ug tingali maoy hinungdan magsige lang sila og away. Usahay ako ang makasab-an either nilang duha kon magsipok ang utok. Pero nausab ang hangin sa asawa.
Us aka gabii, iya kong gipa-drive kay manglaag sila sa iyang mga amiga kay niabot ang usa nila gikan sa abroad. Iya kunong mga classmate sa college iyang kuyog. Natural sa ilang edad, manginom panagsa. Hubog na si Mam pagdayong uli namo ug dinhi nagsugod ang tanan. Kalit ra kaayo, ni-kiss siya nako sa lips ug niingon mangita mi og private room. Kinsa bay di ganahan nga humot ug gwapa pa kaayo si Mam bisan sa edad. Naa nahitabo namo ug nausban pa ni. In short, uyab mi sa secret.
Pamalitan na ko niya og gamit pero kanang di kaayo mahalon aron kuno di makabantay si Sir. Di pud mi pirme manglakaw ug sagad itol namo kanang akong dayoff. Ambot giganahan na ko sa akong life, Noy, pero nahalok baya ko masakpan mi. Ang lain nako nahadlukan kay maorag nagkalawom ang among relasyon. Please tambagi ko unsaon ni nako.
PEKS,
Kuyaw bitaw nang inyong situation kay sa tanan, ang imo pang babaye nga amo ang imong karelasyon. Kuyaw kon dunay time nga di mo makapugong, basin anha mo sa ilang balay magtagay sa kalipay, lisod na kon anha mo maabtan. Kon dunay armas ang lalake, basin madisgrasya pa mong duha. Gawas pa, naa nay mga anak nga mamahimo usab nimong higpit nga kaaway kon makasakop o makabantay nga duna moy relasyon sa ilang mommy.
Sultihi si Mam nimo nga kuyaw ang inyong sitwasyon kon magpaanod mong duha sa inyong gibati. Putla ang inyong relasyon ug kon di siya mosugot, resign na lang kay sa masulod ka pa sa dako kaayong problema.
Biyudo man ka, makakita ka ra og karelasyon nga kanang way kabilinggan sa kinabuhi. Kanang di ka masulod og problema o worst, mapatay o kaha mapriso. I know lisod na biyaan si Mam nimo kay sa imo pang giingon, humot ug gwapa. Kwartahan pa gyud. Naay ikagasto. Nindot tan-awon ang imong sitwasyon kon mabaw ang paglantaw nimo sa dagan sa hitabo karon. Apan kon magkalami na ang relasyon, anha na diha ang kuyaw kay di na mo hapit makapugong sa inyong emosyon. Ayaw pasulabi sa imong gibati kay ang tanan, ngadto sa imo o inyong kadaut ang padulngan.
NOY KULAS