KAMPANYA na sad. Atong dakong pasalamat sa kahitas-an nga sa atong pagsaulog sa Semana Santa walay mga katalagman nga nahitabo. Happy Easter sa tanan!
Ang Semana Santa maoy usa sa mga importante nga kalihokan sa Simbahan nga Katoliko. Gibalaan ang adlaw nga Huwebes ug Bernes nga kon mahimo walay pagabuhaton ang usa ka katoliko gawas sa pagsimba, visita iglesia, paagi sa krus, pag-apil sa prosesyon, ug ang dili pagkaon og karne.
Si Cebu Archbishop Jose Palma, sa iyang mensahe niadtong Adlaw sa Pagkabanhaw, nagawhag sa mga katoliko nga palapdan ug ipadayon and ilang pagsalig ug pagtuo sa Ginoo sama sa pagtuo ug pagsalig ni Jesus sa iyang Amahan.
Taliwa ning panahon karon nga daghan na ang “fake news” kon mga balita nga pulos bakak di na ta makaseguro kon kinsa ang matinud-anon mao nga si Arsobispo Palma nanawagan kanato nga mga katoliko sa pagpalad sa atong pagtuo ni Hesukristo sama sa iyang pagtuo sa Dios Amahan.
Karon, maglisud na ta og tino kon kinsa ang nagsulti sa matuod labina sa mga pulitiko tungod sa naghingabot nga piliay sa Mayo 13. Kon maminaw ka sa gipanulti sa mga kandidato ug sa ilang gigasto sa ilang kampanya ning umaabot nga piliay sa Mayo 13 morag wa mag-atubang sa kalisud ang atong nasud.
Naay mga kandidato nga nag-atubang na og kaso nga pangurakot apan nagpabaga lang gihapon sa ilang nawong ug nagpaka-aron ingnon nga way lama ang ilang pagkatawo. Unsaon na lang ning atong sistema? Mao nga kitang mga botante atong kilatison ang mga kandidato usa ta moboto. Di ta magpadala sa kwarta.
Sugod kagahapon, liwas sa kwaresma, nangampanya na sad ang mga kandidato tungod sa nagkaduol na ang piliay sa Mayo 13. Gani, ang mga kandidato pagka-senador kadaghanan kanila dunay TV ads sa mga dagko nga TV station. Nagpasabot lang ni nga ang kandidato pagka-senador nga dunay TV ad daghan og pundo. Kon dunay daghan nga pundo, duna say negosyo, di ba?
Apan kon si Atty. Amay OngVaño ang pasultion di siya moboto sa kandidato nga dunay TV ad nga kada gawas mokostar og P1.5 milyunes tungod kay, matud pa niya, ang sweldo sa senador P117,086 lang matag buwan. Di ba dakong kahibulongan tuod nga naay mga nanagan nga wa ta kahibawo kon duna bay negosyo?
Pero pung pa sa akong amigo nga nagtrabaho sa kongreso nga kanang magasto sa kandidato karon sa kampanya bisan pa og minilyon dali ra nga mabawi sa panahon nga modaug ug makalingkod na. Nagpasabot ba lang ni nga naay sayon nga pagpangita og pundo og naa sa kongreso? Bantog ra daghan gihapon og modagan bisan og nag-atubang nag kaso nga korapsyon.