KON tinuod man ang mga post nila ni Cebu City Mayor Tomas Osmeña kalabot sa mga checkpoint sa kapulisan sa Dakbayan sa Sugbo duol sa iyang nataran, mas makadaut kini sa imahe sa kapulisan. Mahimo sab nga maduhigan ang oposisyon kay sila ang dudahan nga nagpaluyo niini.
Daan nang nagsige og pamasangil ang mayor nga ang iyang mga sakop nga mga barangay kapitan sa kabukiran gihasi sa mga tawo nga nagtaptap nga iyang gidudahan nga mga pulis. Bisan di tinuod, kini nga mga hitabo maghimo na hinuon kang Osmeña nga maorag makaluluoy bisan tuod kon siya mismo gidudahan nga nigamit sa samang taktika niadtong 2016 elections.
Bitaw, mga taga bukid niadto nangahibung nganong ang mga personnel sa national agencies, sama sa Land Transportation (LTO), naabot sa kabukiran sa Dakbayan sa Sugbo sa pagpanakop og mga habalhabal atol sa eleksyon.
Sa dagan sa mga hitabo karon, si Osmeña nakagamit niini og maayo nga propaganda pabor kanila. Iya ning gigamit aron ig-on ang emosyon sa mga tawo nga maisip nga neutral ug kadtong magpaling paling pa.
Busa, mas maayo kon dunay makatambag sa mga pulis nga ihunong kining mga checkpoint duol ni bisan kinsang balay sa pulitiko. Sa giingong mga harassment sa kabukiran, di maghuwat ang kapulisan nga ang mga barangay kapitan nga hingtungdan moduol aron imbestigahon. Sila na ang mohimo og aksyon kay kini ilang tahas.
Bisan way pruweba si Osmeña, apan sa iyang pagsige og balikbalik og sulti, mamahimo na kining tuohan ug kalawaton sa ubang mga tawo isip tinuod. Sa karon man gud, gipalutaw niya nga siya ug kaubanan mga biktima, gidaugdaug ug nga gigamit ang kapulisan sa mga pulitiko bisan kon wa siyay ebidensya. Daghan baya ang madala sa mga estoryang paluoyluoy bisan way kamatuoran. Barato kaayo ang tabi.