NAG-abot-abot na ang supply sa dash camera (dashcam) nga libreng ipang-apod-apos sa Cebu City Government ngadto sa 1,000 ka mga operator sa public utility jeepney nga nagbiyahi-an sa siyudad.
Si Assistant City Administrator Annabeth Cuizon nipahibawo nga aana na sa kustodiya sa General Services Office (GSO) ang 250 ka mga dash cam gikan sa supplier nga nakadaog sa P5 milyones nga bidding sa nakalabay nga mga buwan.
Ang pangulo sa GSO nga si Ronald Malacora miingon nga i-deliver sa supplier ang nahabiling dash camera sa mosunod nga mga semana sanglit wala pa maabot ang ubang dashcam nga gi-order sa winning bidder.
Matod ni Malacora, dili angay mabalaka ang mga makadawat niini kay masaligon sila nga masunod sa supplier ang term of reference nga gisukip notice of award sama sa date sa pag-deliver sa kinatibuk-ang 1,000 ka dashcam.
Si Francisco Ouano, operations head sa Cebu City Transportation Office (CCTO), nagkanayon nga ilang ipanghatad ang maong mga dash cam human sa eleksyon karong Mayo 13.
Ang City Government naghuwat pa sa approval sa Commission on Election may labot sa ilang petition for exemption nga giduso sa nakalabay nga mga semana gumikan sa election ban.
Ang distribution ug installation sa dash cam ipahigayon sa South Road Properties (SRP) diin ang mga operator modala sa ilang mga PUJ.
Si Ouano nipahibawo nga adunay kapin 600 ka mga PUJ nga adunay travel line gikan sa CCTO nga maoy ilang hatagan og prayoridad.
Ang operation head sa CCTO niingon nga mapun-an pa ang maong gidaghanon sanglit siya nagtuo nga adunay mga PUJ nga wa mokuha og travel line apan sa gihapon mahatagan sila sa maong dashcam sa sunod nga batch.
Iyang gipahibawo nga kadtong mga way travel line labing maayo molukat na sila didto sa CCTO ug dili maghuwat nga madakpan para dili makamulta.
Ang pagbutang og dashcam sa mga PUJ gitinguha aron makatabang sa pagsulbad sa krimen sa kadalanan sama sa tulis, pusil ug ubang matang sa krimen nga unang giindosar ni Mayor Tomas Osmeña sa niaging tuig. (PAC)