MIABOT og 946 ka mga tawo ang nasikop atol sa upat ka adlaw nga gihimo nga Synchronized Enhanced Managing Police Operation (Sempo) sa Police Regional Office (PRO) 7, sa tibuok rehiyon atol sa Semana Santa nga gitawag nga “Huli- Holy Week.”
Ang maong operasyon gihimo niadtong Abril 17-21.
Sa dul-an 1,000 nga nadakpan, 266 niini gumikan sa ilegal nga drugas, moabot usab sa dul-an usa ka kilo ang mga nasakmit nga gituohan nga shabu nga mokabat sa P6.2 milyones.
Sa mga nasikop 18 kanila ang anaa sa drug watchlist nga anaa sa category street level pusher.
Samtang moabot sa 479 ang mga nasikop tungod sa ilegal gambling, 170 ka wanted persons ug siyam kanila ang anaa sa Most Wanted list sa nagkadaiyang siyudad sa Central Visayas.
Sa gihimong Oplan Katok adunay 29 ang nadakpan tungod sa loose firearms kadtong mga nanag-iya og armas apan wala nakapa-renew ug 209 ka mga dili lisensyado nga armas ang nasakmit.
Adunay tulo ka tawo ang nasikop tungod sa illegal fishing.
Gitug-an ni Police Brigadier General Debold Sinas nga gihimo nila ang Huli-Holy Week isip pagpakita nga way hunong ang kapulisan sa ilang gihimo nga mga police operation ilabi na atol sa taas nga bakasyon, diin gilantawan nga posible mogara ang mga kriminal ug ilegalista.
Walay natala nga nakalas atol sa operasyon ug walay nisukol atol sa gihimo nga mga police operation, tug-an sa opisyal. (FMD)