HINGPIT nang nakapasahero ang mga Electronic Jeepney (E-Jeep) sa dakbayan sa Lapu-Lapu sukad niadtong Dominggo, Abril 21.
Kahinumdoman nga nalangay ang operasyon sa nahisgotang mga sakyanan gumikan sa kakulian sa dokumento diha sa Land Transportation Franchising and Regulatory Board (LTFRB)7 ug Land Transportation Office (LTO)7 human nga gi-launch duha na ka buwan ang milabay.
Matod ni Malvin Arias, chairman sa United Drivers Operators Transport Cooperative (UDOTCO) nga maoy nagdumala sa mga E-Jeep nga katunga lang una sa 25 ka mga unit ang ilang kasamtangang gipadagan sa pagkakaron gumikan kay wala pa mahuman ang ilang charging station nga ipahimutang luyo sa Gaisano Capital Mactan sa Barangay Pajo.
Sama sa naandang plano P8 pesos ang minimum nga pletihan sa mga E-Jeep ug P1 usab matag sunod nga kilometro.
Sa pagkakaron ang mga E-Jeep manukad sa ilang terminal nahimutang sa luyo sa naasoyng department store.
Magsugod sa 5:00 sa kadlawon hangtod sa 10:00 sa gabii ang biyahe sa mga E-Jeep.
Subli nga gipahibawo ni Arias nga ang rota nga subayon sa mga E-Jeep mao ang national highway sa Brgy Mactan, Maribao, Marigondon, Basak ug pabalik sa Pajo.
Mge rota sa lungsod sa Cordova ug barangay Punta Engaño kasamtangan nga wa pa biyahe-i sa E-Jeep ug hayan sa umaabot nga semana dugang mga unit sa E-Jeep ang moabot sa dakbayan.
Gitataw sa opisyal nga ang operasyon sa E-Jeep wala nagpasabot nga wagtangon na sa hingpit ang tricycle sa dakbayan ug ubang mga Public Utility Jeeepney (PUJ) sanglit kabahin lang gayud kini sa modernization programa sa nasudnong kagamhanan.