MGA pulis gipasanginlan sa usa ka barangay kapitan nga misulod sa ilang compound ug nikuha og hulagway sa iyang balay lakip na ang mga nahimutangan sa CCTV camera niadtong Dominggo sa Pagkabanhaw, Abril 21.
Sa Facebook post ni Kapitan Victor Quijano sa Calamba, Cebu City , iyang gibutyag nga nahibulong siya gibuhat sa mga pulis nga unipormado ug ang uban adunay taptap sa nawong.
“Adunay mga unipormado nga mga pulis ug ang uban nag taptap nga nisulod sa compound diin nahimutang ang akong panimalay. Ilang gikuhaan og hulagway ang akong panimalay ug ang nahimutangan sa mga CCTV camera,” padayag ni Quijano sa iyang Facebook account.
Ang pag-post sa kapitan sa iyang social media account mao ang pagpahibawo iyang lugar ug niawhag mga magbinantayon kanunay diin iyang gihulagway nga kon nahimo kini ngadto kaniya nga amahan sa barangay, labaw na sa iyang mga residente.
“Dako nakong kahibulong sa ilang gipangbuhat,labaw na nga nisulod sila sa way igong rason.” Dugang sa kapitan didto sa iyang Fb post.
Ang balay ni Quijano unang gironda sa mga pulis mga duha ka buwan na ang nakalabay diin siya nakuhaan og armas nga way lisensiya ug natanggong sa weekend didto sa Cebu City Police Office sa wala pa siya nakapyansa.
Si Mayor Tomas Osmeña niingon nga ang maong mga pulis mao ang nag-checkpoint didto duol sa iyang balay sa Guadalupe niadtong niadtong holy week.
Matod ni Osmeña nga ang iya rang mga kaalyado nga kapitan ang giingong gi-harass sa mga pulis.
Si Osmeña nipasangil na usab ni Bise Mayor Edgardo Labella sa maong hitabo ug niawhag nga ipabalik sa iyang balay ang checkpoint sa mga pulis inay hadlukon ang iyang mga kaalyadong kapitan.
“Tell Dino to send your goons back to my house nalang. At least they’re not harassing anyone else while they’re there,“ tipik sa post ni Osmeña sa iyang Fb post.
Si Labella kinsa maoy mo-challenge ni Osmeña pagkamayor sa siyudad karong Mayo 14 nisalikway sa pasangil sa mayor.