SECTIONS
Saturday, September 21, 2019
SUPERBALITA CEBU

'Kristo' sikop; shabu gipasok sa iya sa Ginang

NIDALA sa papel ni Hesu Kristo sa drama sa Dommiggo sa Pagkabanhaw sa Barangay Sambag 2, siyudad sa Sugbo ang nasikop sa buy-bust sa mga sakop sa Abellana police station, pagka alas 11:45 sa gabii sa samang adlaw, Abril 21.

Ang nasikop giila nga si Mark Anthony Jakosalem, 24, taga sitio Upper Kawayan, Barangay Sambag 2, siyudad sa Sugbo.

Nakuha gikan kaniya ang 5 ka gagmayng pakete sa gidudahang shabu ug usa ka putos nga ginamit na sa pag suyop.

Matod ni Police Major Eduardo Sanchez, hepe sa Abellana police station, nga niadtong Dominggo sa kaadlawon dunay programa ang Sambag 2 alang sa Sugat sa Pagkabanhaw ni Hesu Kristo human kini gilansang sa krus pagka Biyernes Santo.

Si Jakosalem ang nagdala sa papel ni Hesus nga gihimo niyang takuban sa iyang ilegal nga negosyo.

“Siya si Jesus Christ sa drama sa Sugat.." matod ni Sanchez.

Sa impormasyon nga nasagap ni Major Sanchez nga siya ang kanunay nga kuhaon nga Jesus Christ sa mga batan-on tungod kay maayo usab kini moarte sa drama.

Giila lang hinuon ni Sanchez si Jakosalem nga street level target apan adunay nakatug-an nga drug player usab sa Sambag 2 nga apil na siya sa namaligya.

Gitug-an niya nga dili tanan nagdala sa ngalan ni Hesus diyosnon na tungod kay adunay mga tawo nga migamit lang sa ngalan sa Ginoo.

Ginang nasikop

Samtang, usa ka ginang ang nasikop sa mga jail officer sa Cebu City Jail human nisuway pag palusot sa kapin usa ka gatus gramos nga gituohang shabu nga gipasok sa iyang kinatawo niadtong Dominggo sa Pagkabanhaw, Abril 21, sa buntag.

Ang nasikop giila nga si Marydel Necesario Tsuji, 58, nga taga 42-A Tabo-an Market, Barangay San Nicolas Central sa syudad sa Sugbo.

Matod ni Jail Supt. Renante Rubio Jail Warden sa Cebu City Jail nga ang maong ginang taod-taod na nga gi-monitor sa iyang mga sakop human sila maka dawat sa kasayuran nga adunay hamtong nga babaye ang mopalusot og ilegal nga drugas.

Tungod niini, gipaalerto na niya ang iyang mga jail officers nga bantayan ang mga hamtong nga babaye nga moduaw sa priso.

Alas 11:27 sa buntag niadtong Domingo, nabantayan ni JO1 Virzeneth Supieza nga maoy hinungdan nga gipaubos siya sa subsuo nga body search.

Pinaagi sa pag hiling sa iyang kinatawo gamit ang flash light nakita ni JO1 Supieza ang usa ka dakong putos nga gipasok sa iyang kinatawo.

Gipaubos dayon sa imbestigasyon si Tsuji kung kinsa ang iyang hatdan sa maong ilegal nga drugas apan giingong wala siya maka ila.

Gipadala lang matod pa kini sa usa ka babaye nga iyang nakasugat sa Panganiban bridge bugti sa suhol nga P3,000.

Gimandoan siya niini nga dalhon sa sulod sa City Jail apan wala matod pa kini makaila kinsa ang iyang hatdan nga inmate sanglit mosugat lang kini kaniya.

“Ang iyang ingun karon pa daw ni siya nag buhat ani pero wala mimituo kay target na namo ni siya kay ang among info naay tiguwang nga magpalusot,” matod ni Jail Supt. Renante Rubio.

Wala magtuo si Jail Warden Rubio nga sa pangidaron ni Tsuji makapasulod pa niini ang gidak-on sa putos nga motimbang sa kapin usa ka gatos gramos nga shabu nga wala gisulod sa condom.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph