USA ka cargo vessel nga nag-angkorahe sa kadagatan sa Asian Grains sa dakbayan sa Naga ang nasunog.
Kini nahitabo niadtong Lunes, Abril 22, samtang nag-welding ang usa sa mga tripulante sa atubangang bahin sa barko haduol sa hydraulic hatch.
Giresponderhan gilayon sa Philippine Coast Guard District Central Visayas ang MV Andrea Princess 2 pipila lang ka gutlo sa pagsugod sa sunog.
Daling gipadala sa PCG 7 ang duha ka barko niini nga BRP Capones ug BRP Suluan lakip na ang Coast Guard Medical Team ug ang Coast Guard Marine Environmental Protection Group annd Special Operations Group aron motabang pagpawong ug sa alas 10:30 sa gabii nakontrolar ang kayo.
Alas 11:59 sa maong kagabhion gideklarar na kini ni Cebu Station Commander Alvin Dagalea nga fire out.
Base sa imbestigasyon sa Coast Guard pinaagi na usab sa kapitan sa maong barko nga si Dario Castañares nga nag-welding ang tripulante niini duol sa mga kahoy ug mga pintal.
Daling nakakatag ang kayo apan napugngan kini sa mga tripulante kinsa unang nisuway pagpawpng niini gamit ang ilang portable fire pump.
Karga sa maong barko ang 16 ka sako sa copra; 8,570 ka litro sa diesel ug 100 ka litros sa lube oil.
Iya sa Unified Shipping Lines ang maong cargo vessel diin luwas ang tanang 20 ka tripulante nga sakay niini.
Pasumiteron usab ang kapitan sa maong barko og marine protest sa Marina sulod sa 24 oras. Wala ra hinuo’y oil spill nga namonitor ang Coast Guard Marine Environmental Protection Team.