DINHI sa Sugbo, alang sa tibuok Kabisay-an, gihimo ang una nga Local Community Consultation sa National Anti-Poverty Commission (NAPC) Martes, Abril 23.
Sa Miyerkules, Abril 24, himuon sa Calbayog, Samar ang laing konsultasyon alang sa Eastern Visayas.
Kini alang sa ilang programa nga 5-year Development Plan o gitawag nga "Sambayanuhan Serbisyong Sambayanan."
Programa kini sa NAPC aron pagtabang pagkunhod sa kapobrehon sa atong nasud kun poverty incidents.
Gitug-an ni NAPC Secretary Noel Felongco, kinsa nangulo sa konsultasyon nga nius-os ang poverty incidents sa nasud gikan sa 22.2 percent sa 2015 ngadto na sa 16.1 percent sa 2018.
Gipasabot ni Felongco nga sa niaging tuig, namugna ang NAPC 5-year Development plan, ug sa kaning tuiga tinguha nila nga makuha ang mga proposal sa nagkadaiyang sector sa tibuok nasud: ang mga sektor sa mag-uuma, mananagat, kababayen-an, mga batan-on, informal settlers, indigenous people ug uban pa.
Sa gihimo nga konsultasyon, gipaminaw ang matag sektor sa ilang mga yangungo kon unsa sa ilang panan-aw ang hinungdan nga pabilin sila nga naglisod.
Tabangan sila kon unsa nga mga paagi o programa sa matag sektor ilang nakita nga mapalambo ang ilang mga kahimtang ug moduso og proposal ngadto sa NAPC.
Sa gihimo nga konsultasyon, aduna'y 200 ka mga partisipante nga mao'y nag-representar sa nagkadaiyang sektor sa Sugbo.
Gipasabot ni Felongco nga sila sa NAPC ang moduso sa mga proposal ngadto sa hingtungdang ahensya sa gobyerno alang na usab sa paghatag og pondo.
Niadtong Enero ning tuiga, gihimo ang regional consultation sa Central Visayas nga gihimo sa Dakbayan sa Sugbo, diin usa sa mga nakita nga problema sa Sugbo ang pabiling daghang urban poor. Gipangitaan na kini og paagi alang sa desente nga pabalay.
Lakip na sa nakita ang problema sa mga mag-uuma, sa mga corn ug coconut farmers nga imbes ubay-ubay diri sa Sugbo, kulang lang sa teknolohiya aron mapalambo pa ug makatabang sa mga kabus.
Sa programa nga 5-year Development Plan, tinguha niini nga sa 2023 sa pagtapos sa pamunuan ni Presidente Rodrigo Duterte, dako ang pagkunhod sa porsyento sa kakabus sa mga Pilipino.
"Ang tumong ani, is a convergent approach, specifically sa gitawag nato 'call of the government approach' kon asa ang government agencies, including local government units, magkauban aron paghatag og tinuoray nga serbisyo sa katawhan, ilabi na ang mga gitawag nato nga pobre, mga marginalized, vulnerable ug oppressed nga sector sa atong komunidad," pagpasabot ni Attourney Felongco.