NAKABSAN sa kinabuhi ang usa ka lalaki human nabanggaan sa multicab samtang nagmotorsiklo didto sa Barangay Sibantang, lungsod sa Talisayan, Misamis Oriental.
Giila ang biktima nga mao si Jun Japos, taga Barangay Tagbocboc, sa susamang lungsod.
Sa inisyal nga report sa Talisayan Police Station, nasuta nga kining biktima sakay sa motorsiklo kuyog ang iyang 5-anyos nga batang babaye paingon unta sa Barangay Sibantang aron mosimba sa dapit.
Apan usa ka multicab nga gimaneho ni Mario Din-awan nga mokuha og lugit nga katabo niini sa tugbungon bahin ang nawad-an og brake maoy hinungdan nga didto kini mipaingon sa biktima.
Deretsong naitsa niini ang iyang anak sa kasagbutan nga bahin, hinungdan nga nabalian sa iyang duha ka mga tiil, samtang ang biktima maoy sobrang nagrabehan ug nabangil pa kini sa ilawom, naguyod nga maoy hinungdan nga nabalitok pa ang multicab.
Gani ang iyang anak nagsige hilak ug siyagit nga tabangan iyang amahan.
Daling gidala sa Misamis Oriental Provincial Hospital sa Talisayan apan tungod kay grabe niadtong tungora, giduso sa Northern Mindanao Medical Center ning siyudad sa Cagayan de Oro apan dead on arrival kining gideklarar sa mga doktor.
Sa pagkakaron, luwas ang anak niini nga anaa pa usa ka balay tambalanan.
Matud sa inahan sa biktima nga si Julieta nga sa niaging tuig lang namatay ang amahan niini lakip ang laing igsuong lalaki, hinungdan nga gikasakit nila og maayo nga nawad-an karon na sila og bugtong lalaki nga nipasalig kanila nga dili mobiya kanila.
Gani sa wala pa nahitabo ang insidente, nakasulti si Jun sa inahan nga nakadamgo kining kuhaon na sa amahan ug igsuon apan kini si Jun nagsige og ingon nga dili usa magpakuha kay aduna pay gamayng anak.
Sa pagkakaron, adunay nahitabong settlement tali sa duha ka parte kon asa ang nanig-iya sa multicab nga nakabangga usa ka barangay kagawad sa Barangay Sta. Ines sa maong lungsod.