LIMA ka mga lugar sa Northern Mindanao ang gipa-ubos gihapon sa category red kon "areas of grave concern."
Gibutyag ni Police Lieutenant Colonel Surki Sereñas, sa Police Regional Office (PRO)-Northern Mindanao, atol sa Talakayan sa Philippine Information Agency nga gitambongan sa mga personahe sa Commission on Elections (Comelec), Armed Forces of the Philippines (AFP), ug sa PRO-Northern Mindanao nga nalakip ang rehiyon sa category red basi sa labing ulahi nga pronouncement sa Camp Crame niadtong bulan sa Marso pinaagi ni Philippine National Police (PNP) Chief General Oscar Albayalde.
Gipasabot ni Sereñas nga giila ug gi-classify ang election hotspots ngadto sa upat ka kategorya nga mao kining: Green, Yellow, Orange, ug Red.
Ang kategorya sa green nagpasabot sa mga lugar nga walay security concern, malinawon ug luwas.
Ang kategorya nga yellow mao ang lugar nga adunay kasaysayan sa election-related violence o adunay mga intense nga partisan political rivalry.
Ang kategorya nga Orange gilakipan sa factor niadtong kolor yellow adunay seryosong mga hulga gikan sa mga terorista.
Ang kolor red mao ang gilangkoban sa factor kon diin sulod ang kategorya sa kolor yellow ug orange ug adunay mga kondisyon nga basihan alang sa deklarasyon nga kontrolado sa Comelec.
Sa nasod, adunay 570 ka mga areas nga ubos sa red category diin 454 niini gikan sa siyudad ug mga lungsod. Baynte-syete ka probinsya ang pasok sa unom ka rehiyon sa Mindanao.
Niadtong Marso, ang area nga ubos sa kategorya red mao ang 94 ka lugar nga gilangkoban sa 27 gikan sa Bangsamoro Autonomous Region in Muslim Mindanao (Barmm), 19 sa Bicol, 7 sa Calabarzon ug Western Mindanao, 6 sa Mimaropa ug Western Visayas, 5 sa Northern Mindanao, 4 sa Soccsksargen ug 3 sa Eastern Visayas, 2 sa Central Luzon ug Davao, ug 1 sa Caraga ug Cagayan Valley.
"Lima ang grave concern nato dinhi sa Northern Mindanao, though we do not question kay there are parameters to be [declared as] areas of security concern," matud ni Sereñas.
Dugang niya nga ila kining gisuta, gimonitor aron mahatagan og dugang atensyon.
"Naay mga kandidato nga intense ang rivalry; it has always been a great concern. What is good na identified nato and we are doing our best sa kinahanglanon sa area," matud ni Sereñas.
Una na nga miingon si Albayalde nga iyang personal nga suroyon kining mga lugara aron makita ang sitwasyon ug mahatagan og aksyon.