GIPABANTAYAN na ang Sinulom falls human nag-viral sa social media tungod sa reklamo sa mga nangaligo nga giingong gipabayad sila aron lang makaagi sa dapit niadtong Abril 20 sa Tambo, Barangay Tignapoloan, sa siyudad sa Cagayan de Oro.
Nag-post sa social media ang Facebook user nga si Kit Jumalon sa kasinatian samtang pauli na gikan sa maong falls ug niani kini og daghang mga negatibong komento ug mga kabalaka.
Nanghinaot usab kini nga ma-askiyonan aron nga dili na mausab ngadto sa laing mga mobisita sa dapit.
Sa pakighinabi kang Konsehal Jay Pascual, tsirman sa komitiba sa Turismo, nga ipasalig niini nga dili na kini mausab ilabi na nga hugot na niini nga gipabantayan sa mga Barangay Tanod.
“Actually, katong nahitabo dili na gyud to mahitabo usab, pagkagabii ana amo na gyud gipapostingan og mga Barangay Tanod kay kato okay man to siya nga tao kung mahubog lang gyud siya mangita siya og gubot,” matud ni Pascual.
Gi-aghat usab niini ang katawhan nga mobisita sa maong falls ug gipasalig nga luwas ang maong lugar ug gani usa kini nga gitutokan nga mamahimong friendliest tourist place.
“Kung moadto mo sa Sinulom falls naa naman tay mga Barangay Tanod didto, mag request naman ta og tourist police nga magbutang na ta og gamay nga station para sa atong kapulisan,” dugang niini.
Gipasigarbo usab niini ang bugnaw kaayo nga dapit nga pwedi gani nga mainom ang tubig ug kasamtangang gi-develop ang laing water spring nga bulaw nga katuloon pa ang kabugnaw sa Sinulom falls.
Gidugang ni Pascual nga daghan ang nakabenepisyo pagbukas sa Sinulom falls ilabi na nga ubay-ubay ang nakabaton og mga trabaho lakip na usab mga panginabuhian sama sa pagpamaligya og mga pagkaon ug mga motorsiklo.
Giklaro usab niini nga ang maong yuta gipanag-iyahan na sa siyudad.