DEAD on the spot ang usa ka lalaki human gipusil sa upat ka wala mailang suspek pasado alas 10:10 sa gabii Biyernes, Agusto 23, 2019 sa Zone-6 Poblacion lungsod sa Opol, Misamis Oriental.
Giila ang biktima nga mao si Nicanor Lumacang Cabatuan Jr., 57, minyo, residente sa susamang dapit.
Basi sa inisyal nga imbestigasyon sa Opol Police Station sa pagpangulo ni Police Major Evary Bacunawa nasuta nga ang biktima kuyog sa iyang mga higala nga nag-inom sa usa ka tindahan dihang kalit miabot ang upat ka mga lalaki pulos nag sul-ob og bonnet.
Gipusil ang biktima unom ka higayon hinungdan sa pagkaligid niini ug maoy hinungdan sa iyang hinanaling kamatayon.
Dali sab dayon nga misibat ang mga suspetsado paingon sa wala matinong direksyon.
Nasayran nga si Cabatuan giingong bag-o lang nakagawas sa prisohan gumikan sa kasong may kalambigitan sa pagpayuhot sa ginadili nga druga.