MULTAHAN ang mga kan-anan sa siyudad sa Cagayan de Oro nga dili mohatag og "half rice" ngadto sa ilang mga kustomer.
Matud ni Konsehal Annie Daba, tsirman sa komitiba sa Agrikultura sa Konseho, nga mahimong moreklamo ang mga kustomer batok sa mga kan-anan nga mobalibad paghatag og half rice.
“Kung ila ng buhaton nga kinahanglan gyud og one cup rice, pwedi ra sila mag-reklamo kay tanan establishments halos atong natagaan og copy, i-report, pwedi magreklamo,” matud ni Daba.
Matud ni Daba nga tumong niining half rice mao ang pagdaginot ug dili mausikan ang kan-on kong dili mahurot.
Bisan ang mga food chain sa siyudad angay nga mosunod sa maong balaod.
“Tumanon lang nila tong atong balaod ug inyong customer bisan pag sa Jollibee kung magkihanglan og half rice, inyong tagaan og half rice kay mao namay balaod,” dugang niini.
Kini nga sa ordinansa sa siyudad dunay numero 12685-2013 nga nagmando sa tanang mga kan-anan lakip mga fastfood chains, cafeteria, caterers ug uban pa nga mga nagbaligya og pagkaon nga kinahanglan nga ilakip sa ilang menu ang pagbaligya og half rice.
Ang makalapas niining maong bala-od dunay multa nga P1 mil sa first offense, P2 mil sa second offense, ug sa third offense anaa sa P3 mil ug kanselasiyon sa business permit.
Kung dili kini makahatag sa iyang multa, posibleng mapasakaan kini og kaso ug dunay multa nga dili mo-ubos sa P3 mil ug dili molapas sa P5 mil lakip na pagkabilanggo sulod sa dili mo-ubos sa walo ka bulan ug usa ka adlaw ug dili molapas sa dose ka bulan o usa ka tuig.