GI-APROBAHAN sa Konseho ang resolusiyon paghangyo sa Department of Public Works and Highways (DPWH) nga ibalik sa orihinal nga plano ang kasamtangang proyekto nga dalan sa Barangay Bulua, sa siyudad sa Cagayan de Oro.
Nahimo kining hisgutanan niadtong nilabay nga semana human tulo sa mga nanag-iya og yuta ang nireklamo batok kay Jose Gabriel “Pompee” La Viña, kinsa kasamtangang nagpapili pagkamayor sa siyudad ug usa sa mga init nga kaatbang ni Mayor Oscar Moreno.
Usa sa mga nireklamo atol sa committee hearing sa komitiba ni Konsehal Zaldy Ocon si Engineer Hilario Balvin human gi-usab ang plano sa proyekto nga pabor sa properidad ni La Viña nga walay konsultasiyon ug walay ilang panugot.
Sa pakighinabi sa SunStar Superbalita kang Ocon, gibutyag niini nga tumong sa gipasa nga resolusiyon nga mabalik sa orihinal nga plano ang maong proyekto ilabi na nga wala kini konsultasiyon sa publiko.
“Taod-taod na na nga project pero ang problema sa mga tawo imbes kay approved na ang ilang consultation kalit lang nahunong unya gi traverse sa property nga moagi kang La Viña,” matud ni Ocon.
Samtang una na usab nga gitubag ni La Viña ang maong isyu nga imbes siya ang agrabyado, kini na hinuon ang gihimong dautan human usab nga iya nga gidonar ang maong yuta nga nagkantidad og P20 milyones alang sa mga Kagay-anon.
Samtang matud ni Ocon nga bisan pa man kung ibutang nga gidonar ang maong yuta apan dili kini angayan tungod kay wala kini niagi og konsultasiyon sa publiko ug dako kaayo ang giingong deperensiya tungod kay kung moagi sa yuta ni La Viña hiwi-hiwi ang dalan.
“Tugotan ta gi donate, e present niya ug ikaduha naa bay consultation meeting wala man, dako kaayo hiwi-hiwi ang dalan straight na kaayo ni, hiwion pa gyud,” matud ni Ocon.
Ang maong resolusiyon aprobado niadtong Abril 22 sa sesiyon sa konseho nga dunay numero nga 2019-109 diin naghangyo sa DPWH nga ibalik sa orihinal nga plano ang maong proyekto human usab sa mga gipahigayon na nga mga konsultasiyon. Gi-amendahan usab kini ni Ocon diin moagi na kini sa Bulua Highway ug sa LTO paingon sa coastal road diin una sa resolusiyon dili kini moagi sa Bulua Highway.