Linog sa Visayas dili konektado sa Luzon quake

CEBU. Si Robinson Jorgio, ang seismic observer sa Philippine Institute of Volcanology and Seismology (Phivolcs) sa Lapu-Lapu City. (Fe Marie Dumaboc)
CEBU. Si Robinson Jorgio, ang seismic observer sa Philippine Institute of Volcanology and Seismology (Phivolcs) sa Lapu-Lapu City. (Fe Marie Dumaboc)

DILI konektado ang magnitude 6.5 nga linog nga nasinati sa Kabisay-an ala 1:37 Martes sa hapon, Abril 23, sa linog nga nahitabo sa Central Luzon Lunes sa hapon, Abril 22.

Giklaro ni Robinson Jorgio, ang seismic observer sa Philippine Institute of Volcanology and Seismology (Phivolcs) sa Lapu-Lapu City, nga managlahi og fault line ug layo ra ang distansya sa duha.

Ang fault line diha sa may San Julian, Eastern Samar ang anaa sa category nga potential active.

Pasabot ni Jorgio nga nakalihuk kini lima ka libu ka tuig na ang nilabay.

Ang maong linog nabatyagan kon adunay Intensity 6 sa San Julian, Eastern Samar; Intensity 5 sa Tacloban City sa Leyte, Catbalogan City sa Samar, General McArthur, Salcedo, ug Guiwan sa Eastern Samar, Naval sa Biliran, Catarman sa Northern Samar, ug Palo ug Pastrana sa Leyte.

Intensity 4 ang nabatyagan sa mga lugar sa Abuyog, Hilongos, Javier, Capoocan, Julieta, Baybay, Barogo, Jaro, Matalum, Villaba, Leyte, San Francisco, Southern Leyte, Bislig City, Surigao del Sur, Iloilo City, Naga City, Sorsogon City, Panganiban, ug Catanduanes.

Intensity 3 sa Legaspi City, Iriga City, Argao City, Cebu City, Bogo City, Camarines Sur, ug Surigao City.

Gitug-an ni Jorgio nga ang dakbayan sa Mandaue nakasinati og Intensity 2, samtang sa syudad sa Lapu-lapu ang Intensity 1.

Human sa 6.5 magnitude nga pagtay-og, nakatala pa og pipila ka mga aftershock diin alas 2:41 sa Martes sa hapon nitala og 4.6 magnitude.

Giklaro ni Jorgio nga wala pa gyuy kahimanan nga naimbento nga maka-predict kon kunus-a ug asa ang sunod nga pagtay-og, hinungdan nga pahimangno niya sa publiko ug sa kagamhanan nga angay lang nga siguruon nga lig-on ang pundasyon sa pagkatukod sa mga straktura sama sa mga balay ug mga edipisyo.

"Ang pag-uyog o pagtay-og tungod sa linog dili makapatay, pero ang estraktura nga matumpag, mahugno, mahulog ngadto sa tawo mao nang makamatay, mao nga kay naka-experience na ta og mga kusog-kusog nga linog, unta ma-leksyon nata, ato siguruon ang pundasyon sa mga building, sa paghimu sa mga dan. Kay ang linog naa na pirme, kay galihok man ang kalibutan," pagpasabot ni Jorgio.

Samtang human sa nabatyagan nga pagtay-og, ang kabomberuhan sa dakbayan sa Mandaue ug Bantay Mandaue ang ni-responde og smoke alarm sa Gaisano Grand mall sa Barangay Centro, Mandaue City.

Matud sa kabomberuhan nga pasado alas 2 sa hapon dali nga nipagawas ang mga tawo sulod sa mall, human nga ang aso gikan sa ika-lima nga andana duol sa power house, giingon nga susamag tungod sa chemical.

Ang mga bombero sa Mandaue City Fire Station ang gikinahanglan pa nga mag-breathing apparatus sa pagsud aron sa pagpaventillate ug pagpagawas sa aso.

Usa sa ilang gisusi karon kon tunhod ba kini sa pagtay-og o tungod sa kainit sa panahon.

Hinuon, wala ray natala nga naangol sa maong insedente. (FMD/Superbalita Cebu)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph