MAS grabe pa nga kainit sa panahon ang gipaabot nga masinati sa mga mosunod nga adlaw, ilabi na unya sa pagsulod sa bulan sa Mayo.
Kining buwana maoy giila nga pinakainit nga bulan sa tibuok tuig sa Central Visayas.
Gitug-an ni Jhomer Eclarino, weather specialist sa Philippine Atmospheric, Geophysical and Astronomical Services Administration (PAGASA) Mactan nga natala sa Sugbo ang pinakataas nga temperatura ning tuiga sa 34.6 degree celsius, niadtong Sabado, Abril 20.
Adunay heat index kon kainiton nga mabatyagan sa tawo nga 42 degree celsius, taas sa pinakataas sa niaging tuig sa bulan sa Abril nga 40 degrees celsius.
Apan ang pinakataas nga heat index nga niabot og 43 degrees celsius natala niadtong Abril 18, sa alas 2:37 sa hapon, tungod sa temperatura niini nga 34.4 ug humidity kon kaigangon nga niabot sa 59 percent.
Gipasabot ni Eclarino nga ilang nalantawan nga motaas pa ang temperatura nga masinati tungod sa presensya sa weak El Niño.
“We are expecting mas maayo nga panahon o init sa next days until Sunday, kay wala gyud tay weather disturbance nga makahatag og ulan, anaa tay Easterlies o hangin gikan sa silangan. Yes, until May, possible mas init pa kay naa tay Weak El Niño,” pagpasabot ni Eclarino sa Superbalita Cebu.
Kon sa niaging tuig niabot og 45 degrees Celsius ang kainit nga mabatyagan sa Sugbo sa bulan sa Mayo, matud ni Eclarino, nga mas motaas pa kini.
Hinungdan nga subling pahinundom sa publiko ang paglikay sa pagbulad sa init gikan sa mga oras nga alas 10 sa buntag hangtud sa alas 3 sa hapon.
Mas grabe pa usab nga huwaw ang posibleng matagamtam. (FMD)