SUBO pamalandungon nga daghang mga kinabuhi ang nakalas sa mga panghitabo sa kalibutan ning panahona.
Una ang pagpamomba sa Sri Lanka nga mikalas og hapit 300 ka mga tawo ug miangol sa daghan pang uban nga naa sa nagkadaiyang mga mga balay tambalanan.
Ang pagpamomba nahitabo sa mga hotels ug simbahan atol sa Easter Sunday nga sagad magdugok ang mga tawo.
Giingon nga ang pagpamomba hinimoan sa teroristang grupo.
Ikaduha, ang dakong kadaut nga hatud sa 6.1 magnitude nga linog didto sa Zambales nga nikonektar sa Metro Manila ug Central Luzon niadtong Lunes sa hapon.
Gawas sa mga kadaut, nikalas na kini og 11 ka mga tawo, sukad kagahapon.
Base sa taho sa National Disaster Risk Reduction and Management Council (NDRRMC) nga dunay 81 pa ka mga tawo ang naangol.
Samtang duna pay laing 24 ka tawo padayong gipangita human wala na igkita atol sa linog nga gituohang na-trap sa nahugno nga gambalay nga Supermarket sa Porac, Pampanga.
Gibanabana nga nidamyos na og P200 milyon ang kadaut sa mga kalsada, tulay, dike ug gambalay Pampanga ug Metro Manila.
Samtang Martes sa hapon, laing 6.2 magnitude nga linog nitay-og sa Eastern Samar, mga kapin 24 oras lang human ang unang linog.
Namatikdan sab ang linog sa nagkadaiyang dapit sa Visayas ug Bicol Region.
Atong ipaabot ang atong pahisubo ngadto sa mga biktima sa katalagman nga nagbangutan pa sa hitabo.
Atong iampo nga taliwala sa nahitabo sa ilang kinabuhi, padayon gihapon silang mosalig sa Ginoo ug paspas nga mahupay ang ilang kasub-anan, ilabi na gyud kadtong namatyan.