NAHIMONG headline sa SunStar Davao kagahapon ang balita nga dunay mga journalists ug mga abogado nga nagtinguha nga palagputon sa pwesto si Pangulong Rodrigo Roa Duterte.
Kini human migawas sa Manila Times ang matrix sa mga tawo nga nagkunsabo nga palagputon ang pangulo.
Mga personalidad sa matrix gikan sa Philippine Center for Investigative Journalism (PCIJ), Vera Files, Rappler, ug National Union of People’s Lawyers (NUPL).
Ang matrix, nga gititulohan og Association Matrix Between Bikoy and Ellen Tordesillas, nagpakita sa koneksyon sa mga tawo sa nahisgutan nga mga news organizations.
Si Bikoy mao ang tawo sa video nga niangkon nga kanhi sakop sa sindikato sa druga ug naglambigit sa pamilyang Duterte sa sindikato.
Daghan ang nituo sa maong matrix tungod kay gikan kini
sa Opisina sa Pangulo.
Suma nila, di makwestiyon ang pangulo tungod kay anaa kaniya ang tanang resources sa pagkalap og impormasyon gamit ang iyang bilyon-bilyong intelligence fund.
Apan, giingon sa mga hintungdan nga di kini tinuod, usa ka basura ang nahisgutan nga matrix.
Sa among programa sa radyo kagahapon sa buntag, gipangutana ako ni Aksyon Jhun Suter kung unsa ba ang PCIJ? Duna bay kapasidad kini nga mopalagpot sa presidente?
Ug ako siyang gikomedyahan sa pagtubag nga: “Nganong ako man imong pangutan-on nga di man ko sakop sa maong organisasyon?
Sulti sab niya (Suter) nga: “Nangutana ko nimo tungod kay nakatambong ka man sa mga seminars nila.”
Ug ako siyang gitubag nga kini nga news organization, usa ka non-profit organization nga ang tumong mao ang pagtabang sa mga journalists nga palawman pa ang kahibalo sa pagbalita.
Ako sab gihinumdoman ang pipila ka mga workshops kaniadto sama sa pag-imbestiga sa Statement of Assets, Liabilities, and Networth (SALN) sa mga government officials aron masayran kung nagsulti ba sa tinuod ang usa ka empleyado o opisyal sa gobyerno.
Sa ilang mga seminars usab ako nasayud unsaon pagsusi kung kinsa ang mga dagko nga campaign funders sa atong mga politiko ug didto sab nako nasayran ang ilang mga campaign funders mao say mga kontrator sa ilang mga binilyon nga proyekto base sa mga dokumento sa Comelec ug Securities and Exchange Commission (SEC).
Sa among diskusyon kagahapon, akong giingon nga di ko makasulti nga tinuod o tumo-tumo lamang ang matrix, apan atong paabuton ang sunod nga katikaran kay ang burden of proof naa sa nag-akusa nga mao ang presidente.