DIGOS CITY -- Ang Bureau of Fire Protection (BFP) nagbana-bana nga mokabat sa kapin P20 milyones ang damyos sa nahitabong sunog sa karaang Digos City Public Market, Lunes sa kaadlawon, Abril 22.
Nagsugod ang kalayo banda alas 4:30 sa kaadlawon nga milamoy sa dul-an 20 ka mga puwesto sa grocery stores ug ubang tindahan sama sa ukay-ukay.
Si Police Major Jocelyn Grant, city fire marshal, nagbutyag nga ginasubay pa nila kon asa nga puwesto nanukad ang kalayo ug unsay hinungdan niini.
Kahinumdoman nga gilayong nagtinabangay ang kabomberohan sa Davao del Sur ug Davao City human miabot sa Task Force Alpha ang alarma.
Hinuon, gideklarang pawong na ang sunog pasado alas 9 sa buntag.
Ang maong gambalay nasunog sab niadtong bisperas sa Pasko sa 2016.
Kini na ang ikatulong sunog nga miigo sa merkado human unang nasunog niadtong 2009.
Gimando na ni Mayor Joseph Peñas ang lawom nga imbestigasyon sa nahitabo dungan sa pagmando sa mga department heads nga dalion ang proseso aron nakapagawas og tabang ang lokal nga gobyerno alang sa mga nasunugang negusyante. (Orlando B. Dinoy)