TACURONG CITY -- Usa ka bata ang nakakaplag sa duha ka improvised explosive device (IED) atubangan sa kapilya niadtong Lunes, Abril 22, alas 9:25 sa buntag sa Barangay Pimbalayan, Lambayong, Sultan Kudarat.
Ang pagkakaplag sa bomba sa bata, nakaluwas og kinabuhi human nga dali kining nataho ngadto sa mga awtoridad una pa man nibusikad ang usa niini.
Sumala kang Sammy Bibat nga nagdula-dula lang ang iyang anak atubangan sa kapilya nga Katoliko sa maong dapit sa dihang nakaplagan niini ang mga bomba.
Human siya gisultihan sa anak, iya dayong gitaho ngadto sa mga sakop sa Citizen Armed Forces Geographical Unit (Cafgu).
Dali sab dayong gikordon sa mga pulis ug sundalo ang palibot sa simbahan aron maseguro ang seguridad sa mga sibilyan.
Apan wala pa gani niabot ang mga sakop sa Explosive Ordnance Disposal Team sa Philippine Army, usa sa duha ka bomba ang nibusikad.
Wa hinuoy naangol apan nakamugna kini og sobra nga kahadlok ngadto sa mga sibilyan.
Samtang ang usa ka bomba, malampuson nga nadepyos.
Grupo sa Bangsamoro Islamic Freedom Fighters ang gitudlo sa mga awtoridad nga nagbutang og bomba sa kapilya. (Edgar E. Fuerzas)