PADAYONG nagpaalim sud sa ospital ang usa ka manghod kinsa gitigbas sa iyang magulang Lunes sa kaadlawon, Abril 22, sa New Loon, Barangay Mintal, Tugbok District, dakbayan sa Davao.
Ang Tugbok Police Station nag-ila sa biktima nga si Rodolfo Monsoling Inco, 38-anyos, samtang ang suspek si Jimmy Monsoling Inco, 40-anyos, residente sa nasampit nga dapit.
Sulod mismo sa ilang panimalay samtang wala kabantay ang biktima, gitigbas sa suspek ang iyang manghud sa nagkadaiyang parte sa lawas gamit ang lagaraw.
Una pa nahitabo ang krimen, nag-abot sa usa ka kombera ang magsuon diin human sa kaon, nag-inom sila.
Dihang lalom na ang gabii ug nangahubog na, kalit na lamang nag-away ang duha, maayo na lamang kay napugngan ug miuli ang manghud.
Apan sekreto diay nga nagdumot ang magulang ngadto sa biktima sa nahitabo nilang lalis ug sa daan nilang bikil niadto.
Nakadagan pa ang biktima human sa pagpanigbas ug nga gidala dayon sa tambalanan, samtang ang suspek nadakpan sa otoridad. (Richy F. Nalagon)