Sud sa Hall of Justice, peke nga abogado giposasan

WALA na kasibat ang peke nga abogado human giposasan sa otoridad atol sa entrapment operation sa Anti-scam Unit sa Davao City Hall ug sa National Bureau of Investigation (NBI)-Davao, Lunes sa hapon, Abril 22.

Ang suspek si Wilhelmo Oropa Romena, hamtong ang pangedaron, residente sa Dacoville Subdivision, Barangay Dumoy, dakbayan sa Davao.

Mismong sud sa Hall of Justice sa Davao City giposasan ang suspetsado.

Una niini, nagpasalig ang suspek nga motabang sa usa ka pamilya kinsang anak napriso gumikan sa kalapasan sa Republic Act 9165 kon Comprehensive Dangerous Drugs Act of 2002.

Sumala sa suspek ngadto sa pamilya nga duna siya’y gahum ug kapasidad isip abogado aron impluwensyahan ang Huwes ug ang prosecutor nga gagunit sa kaso aron mapagawas kini.

Gumikan kay nakumbinsi sa suspek ang pamilya mihatag sila og pasiunang bayad nga P1,000.

Human sa pipila ka adlaw, mipahibalo ang suspek nga kinahanglan niini og P300 mil aron i-piyansa sa napriso apil na ang ibayad sa judge ug prosecutor.

Dinhi na nagduda ang nagreklamo ug gilayon sila nga nakigkoordinar sa anti-scam unit sa City Hall ug sa NBI-Davao diin nasayran nga dili lisensyado nga abogado ang suspek.

Tungod niini, usa ka entrapment operation ang gipahigayon sa otoridad diin nasakpan ang suspek nga midawat sa kwarta nga iyang gihangyo dayon giposasan.

Sulod sa selda sa NBI-Davao, gihimakak sa suspek ang pasangil dungan sa sulti na igo ra kuno siya nga mitabang sa napriso aron makagawas.

Sa karon kalapasan sa Article 177 kon (usurpation of authority), Article 172 (falsification by private individual) ug Article 315 o Estafa. (Richy F. Nalagon)