Human sa 18 ka mga tuig, nakasulod pagbalik sa 2nd round sa National Basketball Association (NBA) Playoffs ang Milwaukee Bucks pinaagi sa pagmakmak og balik sa host Detriot Pistons, 127-104, kagahapon sa Game 4 aron haruson og ang ilang 1st round series, 4-0, sa Eastern Conference.
Ang usa labing lig-ong kandidato alang sa MVP award nga si Giannis Antetokounmpo nagpakatap og career-playoffs high nga 41 puntos aron pangulohan ang yanong kadaugan sa Bucks.
“This means a lot,” matod ni Antetokounmpo.
Sa 2nd round, ang Bucks, nga maoy top seed sa playoffs, makigharong sa fourth-seeded Boston Celtics nga maoy nagpalagpot sa Bucks sa 1st round sa miaging tuig pinaagi sa deciding Game 7.
Sama sa Bucks, ang Celtics taas sab og moral nga mosulod sa 2nd round gumikan kay giharos sab niini ang Indiana Pacers sa 1st round.
Mao sab kini ang labing unang higayon nga nakaharos pagdaog ang Bucks sa playoffs gikan niadtong 1983.
“We’re going to celebrate it and have fun, but we’ll quickly focus on Boston,” asoy ni Milwaukee guard Sterling Brown.
“It’s going to be a fun series. Last year, they got us in Game 7.”
Sa paghiabot ni Antetokounmpo sa ilang puwersa niadtong 2013, layo na og naabtan ang Bucks ug dili ikalimod nga usa kini sa gituohang makapusgay sa gingharian sa back-to-back defending champion Golden State Warriors.
“From where we were and where we are right now, it’s been an unbelievable journey,” matod ni Antetokounmpo. “The organization has done a great job of just pushing in another direction.”
Si Antetokounmpo, kinsa No. 15 overall pick sa Bucks niadtong 2013 drafting, maoy nagsilbeng lider sa Bucks aron makaabot sa ilang nahimutangan sa kasamtangan.
Sa mga praktis ug aktuwal nga mga duwa, kanunay maayo ang gipakita ni Antetokounmpo hinungdan nga mibilib kaniya og maayo ang iyang mga kauban.
“It’s crazy to be able to witness each one of these, it seems like each and every game,” matod ni Bucks center Brook Lopez.
Jazz 107, Rockets 91
Sa Salt Lake City, nakaikyas sa kamot sa pagpanamilit ang host Utah Jazz human nila nabawsan ang Houston Rockets sa Game 4 sa ilang kaugalingong 1st round series sa Western Conference.
Ang kadaugan sa Jazz maoy nakapahak sa labaw sa Rockets, 3-1, sa best-of-seven series.
Gimugna ni Donovan Mitchell sa 4th quarter ang 19 sa iyang kinatibuk-ang 31 puntos aron pangulohan ang kadaugan sa Jazz.
Si Jae Crowder nidugang og 23 puntos alang sa Jazz samtang nitampo og 18 puntos ug 11 assists si Ricky Rubio.
Ang Rockets gipangulohan sa kasamtangang MVP nga si James Harden pinaagi sa iyang 30 puntos samtang nitampo og 23 puntos si Chris Paul. (ESL)