NAGTINGUHA si Team Pilipinas coach Yeng Guiao nga makigharong og balik sa Australia squad sa laing tune-up game isip tipik sa ilang preparasyon alang sa umaabot nga FIBA Basketball World Cup nga ipahigayon karong Agusto sa China.
Nanghinaot si Guiao nga pinaagi niini, hayan maalim ang samad nga nagsilbeng resulta sa grabeng kagubot nga nahitabo tali sa duha ka mga puwersa niadtong Hulyo sa miaging tuig sa World Cup qualifier.
Sa nahitabong binukbokay tali sa Gilas Pilipinas ug Australia, 10 ka mga magduduwa sa Team Pilipinas ug tulo sa Australia ang napahamtangan og suspensyon sa FIBA.
Niadtong higayuna, ang Gilas Pilipinas gigiyahan pa ni coach Chot Reyes.
“We’ve all learned from our mistakes, both sides. Natuto na tayo. I’m sure, ‘yung Australia natuto na rin sa nangyari,” pasabot ni Guiao nga napatik sa Spin.ph.
Gawas sa Australia, nagtinguha sab si Guiao nga iparang ang Team Pilipinas sa New Zealand.
“On the practical side, mas malapit ‘yung Australia at New Zealand kesa magpunta tayo sa Europe to play the same brand of basketball that we really need to experience ourselves,” pasabot ni Guiao.
Matod ni Guiao nga gusto niya nga ning higayuna, taas nga panahon ang itagana sa Gilas Pilipinas sa preparasyon niini alang sa matag upat ka mga tuig nga kompetisyon.
Gitataw ni Guiao nga nagsumiter na siya og proposal sa Samahang Basketbol ng Pilipinas ug Philippine Basketball Association (PBA) kabahin sa iyang mga plano.
Nagplano si Guiao nga magsugod na sila sa pagpangandam karong Hunyo. (ESL)