HUMAN sa San Remigio, magpadayon ang kulbahinam nga aksyon sa amihanang bahin sa Sugbo sa pagpahigayon sa 2019 Mayor Joven Mondigo Invitational Motocross karong Abril 28 sa lungsod sa Medellin.
Sama sa 21st Calambua Motocross Cup nga gipahigayon sa Calambua, San Remigio sa miaging semana, kapin sa 100 ka wala’y kahadlok nga riders ang maglumba sa Medellin nga naila sa ilang world-class golf course, maanindot nga kadagatan ug dakong plantation sa mga tubo.
“Dugay-dugay na sab nga wala ta nakapalumba sa Medellin maong nagtuo ko nga malingaw gyud ang mga tawo ani atong lumba,” matod ni motocross patron Lou Ornopia, tag-iya sa MS Motosuit ug maoy nagpasiugda sa lumba.
Nidugang si Ornopia, kinsa kanhi “Sportsman of the Year’ awardee sa Sportswriters Association of Cebu (SAC), nga mosalmot sa kompetisyon ang dekalidad nga riders gikan sa nagkalainlaing suok sa nasod.
Mangulo sa representasyon sa Sugbo mao ang bantugang riders nga sila si Jonjon Adlawan ug BJ Pepito.
Ang mga kategoriya nga kombatihan mao ang pro open and expert, local enduro, beginners production, mini class 50cc and 85cc, intermediate, novice open production, ug ladies open. Aduna sab special nga lumba alang sa underbone ug buggy categories.
Ang MS Motosuit nakigtambayayong sa Medellin local government unit nga gipangulohan ni mayor Benjun Mondigo alang sa pagpahigayon ning maong kompetisyon.
Mihatag og suporta sa lumba mao ang CLS Properties, MSY Holdings Corporation, Martin Salimbangon Yeung, congressman Benhur Salimbangon, Alex Patino, Gonzalodo Enterprises, Duros Development Corp., Elton Salimbangon, Engr. Godofredo Laga, Jr. ug Liga ng mga Barangay President Edwin Salimbangon. (ESL)