SI NEMIA ang dalaga nga maoy matawag nga labing suwerte dinhi sa ilang balangay kay gipakatawo siya sa sabakang adunahan. Ang iyang ginikanan kaliwat og mga asiyendero. Guwapa siya ug siya ang midaog ug gikuronahan nga Rayna sa ilang lungsod atol sa pagsaulog sa ilang lungsod sa tinuig nilang pangilin. Dili lang kay ang kaanyag ra ang nakuptan niya sa iyang pagka dalaga, utokan sab siya. Mao nga nabansagan sab siya nga ‘beauty and brains.’ Tungod niini dili na maihap ang mga bulak nga nangalawos diha sa ilang basurahan nga ipalabay niya kang Julia nga iyang katabang nga guwapa usab.
Daghang mga ulitawo ang naninguha sa gugma ni Nemia, apan way usa nga nahilambigit sa iyang kasingkasing. Si Hipolito nga anak sa kongresista sa ilang distrito milunga na lang sa iyang paghalad, bisan pa sa kadugay na sa iyang pagpangulitawo.
“Sorry, Hipolito! Wa man god koy gugma nimo. Busa isipa na lang nga ang pagpaninguha nimo nako nga usa ka ‘hobby’ ug dili angay nga itanom sa Hunahuna. Guwapo ka. Ug duna gyuy angay nimo nga babaye ug dili ako,” ni Nemia nunot ang pagpananghid nga matulog na siya. Misulod dayon siya sa iyang lawak. Mao kini ang sitwasyon sa pagbati ni Nemia kay wala pa siyay gisugot sa mga nanghalad sa ilang gugma kaniya.
Apan may ulitawong nakapapitik sa kasingkasing ni Nemia. Kini mao si Segundino, mag-uuma nga atua magpuyo sa sityo Lungag-Omang. Guwapo si Segundino ug nag-inusarang nagpuyo sa karaan nilang balay. Nag-amping si Segundino sa lawas nga di siya maitom kay nagsul-ob man siyag diyaket nga maong ug nagkawo og dakong sarok ug baatan niya ang iyang nawong og nipis nga panapton. Maong morag wala gayud maunsaay ang iyang pamanit. Matag adto niya sa eskina, sa tindahan ni Insek Kang Meng, daghan gyud ang mga dalaga nga mag-ibid-ibid niya, kay lagi guwapo ug Katsilaon ang porma ug gitas-on. Kon mokanta siya sa gipahigayon nga ‘video singing contest’ mosamot pagsibaw ang kadalagahan kay nindot man siyag tingog.
“Julia, pagka guwapo na lang ni Segundino!” ni Nemia ngadto sa guwapa niyang katabang. Si Julia anak sa ilang kusinera nga si Magdalena. Dihay kausa dihang nagkuyog silang duha hisaypan sila nga managsuon. Ugaling lang kay katabang lang si Julia nga maoy sugu-suguon sa iyang amo nga si Nemia.
“Bitaw no, M’am. Guwapo lagi kaayo si Segundino, korag kaamgid ni JerichoRosales,” ni Julia nga mipahiyom.
“Julia, kuyogi unya ko. Adto ta sa utlanan sa among yuta kay kasikbit ra man ang ilang yuta sa amoa, di ba?” ni Nemia.
“Sige, Ma’m Nemia, Kanus-a man ta mangadto?” suna ni Julia.
“Ugma sa hapon,” ni Nemia.
Suwerte sab kaayo kay sa ilang pag-adto sa utlanan diha si Segundino nga nagdaro. Mihunong kini pagkakita kanila. Gitugway ni Segundino ang kabaw human tangtangi sa daro. Miduol si Segundino nilang Nemia ug Julia nga mapahiyumon. Gitutokan og hugot kaayo ni Nemia si Segundino, apan dili siya ang giduol sa ulitawo, kundili si Julia.
“Julia, nia man lagi ka? Ug kuyog nimo si Ma’m Nelia!” matod ni Segundino.
Mipahiyom lang si Julia. Mitupad si Segundino kang Julia ug miawit sa paborito niyang await, “Ikaw ang langit ko.” Unya gikuptan ni Segundino ang kamot ni Julia.
“Julia, ikaw ang damguhon ko inigkaktulog nako karong gabii,” ni Segundino ngadtong Julia. Kining tanan nadungog ni Nemia.
Didto sa ilang mansiyon nakigsulti si Nemia kang Julia.
“Julia, swerte ka, kay naibog si Segundino nimo,,, ug dili nako. Pero, okey lang, kay siya man ang tukmo sa imong gugma... ug ako, nahimo na lang punay sa pagmahay,” padayag ni Nemia. Ug unya nahinumdom siya kang Hipolito kansang gugma iyang giayran. (KATAPUSAN)