SA MIAGING Semana Santa, ang akong pamilya nitugsaw sa mga gutlo sa pamalandong pinaagi sa naandan namong Visita Iglesia nga unom na ka mga tuig namong gihimo.
Di tanan hinuon sa pamilya ang nakauban kay ang dunay nangayog dispensa nga di makakuyog kay may prior commitment sa adlawng Huwebes nga maoy gitakda sa kalihukan.
Ang pamalandong maoy pagpatuhop sa kasakit sa Diyos sa atong kahiladman nga nagpakatawo sa pagluwas kanato. DI ba maluwas ka man kon ikaw makaamgo sa pagbag-o?
Simple ra ang gihimo sa Diyos. Mihukas Siya sa Iyang gahom. Isip tawo gidawat Niya ang silot suma sa gitagna sa propesiya. Pito ka mga pulong ang gilibkas Niya aron kapanaminan sa tawo sa wa pa Siya mamatay sa krus.
Ang mahinuklugon nga talan-awon mao ang duha ka mga kawatan tupad Niya. Si Estas mihagit Niya sa pagluwas kanila kon tinuod siyang Diyos.
Apan si Dimas, ang laing kawatan, nagbasol sa iyang nabuhat nga miingon: Ginuo, hinumdomi ako kon tua na ikaw sa paraiso. Si Hesus mitubag: Karon dayon mouban ka kanako sa parasiso.
Kadaghan sa mga kawatan, kurakot ug tikasan nga mga pulitiko nga nanagan karon sa umaabot nga piniliay. Nahibaw-an ni sa mga kiha, reklamo ug tabi-tabi.
Ang atong sistema sa hustisya nagsunod sa gimbut-an sa Batakang Balaod nga ang akusado inosente samtang wa pa maprubahi sa hukmanan nga sad-an.
Apan bug-at sad ang panultion: May kayo kon may may aso. Kon huyang ang ebidensiya magkatawa ang kawatan kay di man mabilanggo.
Ang nakapiyansa, nakaipsot sa kaso labi na sa pork barrel scam, nanglangsad man gani aron makabalik sa puwesto. Ang uban nakasud ra ba sa magic 12 sa surv...
Tinuod, inosente pa unless proven in the contrary. Apan si Revilla nga gipakaway sala sa korte nakapagimok sa bulibol sa katawhan.
Ang maayong himuon ni bisan kinsa nga kawatan mao ang pagsunod kang Dimas. Magbasol sa ilang nahimo aron mapasaylo sa Ginuo. Magbag-o kaha sila?