Editoryal: Dakong garbo

Editorial Cartoon by John Gilbert Manantan
Editorial Cartoon by John Gilbert Manantan

DAKONG garbo sa Sugbo ang pagpahigayon sa National Youth Day (NYD) dinhi sugod karong adlawa, Miyerkules, Abril 24, dili lang alang sa mga sumosunod sa Simbahang Romano Katoliko, lakip sa tanang Sugbuanon. Pinaagi niini, atong mapapakita ang kanindot sa atong dapit ug ang pagtuyok sa lokal nga ekonomiya tungod sa presensiya sa dili mominos 12 mil ka mga batan-on, 3 mil ka mga boluntaryo sa kalihokan ug uban pang dumuduong.

Nasayod na kitang daan sa kalihokan busa mangandam sa termporaryong pagdoble sa kahuot sa trapiko labi na dapit sa hapon sa pagsugod sa prosisyon padulong sa Plaza sa Sugbo ug Basilica del Sto. Niño gikan sa Cebu City Sports Complec (CCSC) diin ipahigayon ang programa sa pag-abli sa NYD 2019. Kon mokalaw atol ning panahona, magbalon og taas nga pasensiya aron walay sapot nga motumaw o pagsaka sa alta presyon.

Isip mabuot nga Sugbuanon, kaakohan natong tanan sa pagtabang sa pagmintinar sa kahusay ug kalinaw. Kon unsay resulta sa NYD 2019, maayo o dili, dako kini og epekto sa atong imahen. Siyempre, gusto kita sa positibo nga kasinatian sa mga bisita nga mouli sa ilang tagsatgas ka dapit dala ang maanindot nga higayon sa Harang Dakbayan sa Habagatan. Garbo nga atong gihuptan sukad kaniadto pa.

Ang kapulisan, militar ug ang simbahan naningkamot sa kaluwasan sa NYD. Nasayod kita sa dili dugay nga panghitabo sa Sri Lanka sa pag-ataki sa simbahan ug ubang importanteng dapit sa ulohang dakbayan sa maong nasod. Hinuon, walay hulga dinhi sa atong dapit apan dili kita mokompiyansa. Busa, atong suportahan o tabangan ang awtoridad sa pagpaniid sa palibot batok sa mga dautang elemento.

Atong gidasig ang mga igsuong Sugbuanon nga ipakita ug ipabati nato ngadto sa mga bisita sa matam-is nga pahiyom ug pagkamahigalaon. Ug dakong garbo nga dinhi nagsugod sa atong dapit ang Kristiyanismo sa Asya. Puy-an nato kini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph