PALO, Leyte - Pipila ka mga balay ang nangaguba sa lalawigan sa Samar sa pag-igo sa magnitude 6.5 nga linog sa San Julian, Eastern Samar sa Martes sa hapon, Abril 23.
Base sa partial consolidated report sa Police Regional Office (PRO) 8, alas 5 sa hapon, pito ka mga balay ang nangaguba.
Usa ang naguba sa Northern Samar area, lima sa Samar area ug usa sa Eastern Samar area.
Samtang 10 naman ka tawo ang natalang samdan.
Dunay lima sa Northern Samar ug lima sa Samar.
Maagian ang mga karsada ug tulay, apan dunay pipila nga nakasinati og pangliki tungod sa kakusog sa linog.
Sa paghimo ning balita, way natalang nakalas sa linog sa Eastern Visayas.
Sa St. Michael Archangel sa Gandara, Samar, ang rebulto ni Hesu Kristo nga gilansang sa krus natagak.
Ang porma sa dihang natagak daw sama sa makita sa salidang Passion of the Christ, diin gikulob si Hesus human sa paglansang sa krus.
Duna usay kampanaryo sa usa ka simbahan sa Calbayog nga natagak.
Pipila na man ka mga tunghaan ug lokal nga kagamhanan sa Eastern Visayas ang nagdeklarar og class and work suspension.
Kini tungod kay susihon pa sa mga building officials ang mga edipisyo kon luwas ba kini.
Duna usay pipila ka malls ug gagmayng mga tindahan ang sayo nga nanira gumikan sa kadaot.
Dali usab nga nipatawag og emergency meeting ang mga local disaster risk reduction offices sa mga apektadong lugar sa Eastern Visayas.
Sagad gihisgutan sa meeting ang mga angay buhaton sa pagsusi sa mga apektadong lugar. Giklaro usab sa Philippine Institute of Volcanology and Seismology (Phivolcs) nga way hulga sa tsunami ang Eastern Visayas.
Sa kwatro distrito sa Leyte, walay naitala nga kadaut matod sa Department of Public Works and Highways 4th LED.
Sa paghimo ning balita, padayon pa ang pagsusi sa mga awtoridad ug lokal nga kagamhanan sa epekto sa linog sa ilang tagsa tagsa ka lugar.