Bidding sa SRP lot nauswag na usab

SA IKATULONG higayon, naoktaba na sab ang public bidding sa tulo ka ektaryang luna sa South Road Properties nga ibaligya sa Cebu City Government og labing ubos P110,000 matag metro kwadrado.

Kagahapon, Abril 23 mao unta ang gikatakdang adlaw sa pagsubasta ug ang developer nga adunay labing dakog bid matag metro kwadrado apan wala madayon.

Si Assistant City Administrator Veronica Morelos kinsa maoy chairman sa committee on awards maoy nipahibawo ning mantalaan.

“Gipa-postpone lang for the meantime unya wait pami sa written instruction ni mayor,” padayag ni Morelos.

Ang chairman sa committee on awards wala niklaro kon nitunga ba o wala didto sa City Hall ang duha ka developer nga gilangkuban sa Cebu Landmasters ug Federal Land nga maoy una nilang gihulagway nga interested buyers.

Ang yuta nga gustong ibaligya sa City Hall mao ang Lot 1 F-8 Psd-07-075186 nga nahimutang duol sa utlanan sa Cebu ug Talisay City.

Si Mayor Tomas Osmeña gustong mobaligya sa maong luna balor og P110,000 /square meter human iyang gihulagway nga gi-underpriced ang 46 ektaryas sa SRP nga nahalin og P38,000/ square meter atol sa administrasyon ni kanhi Mayor Michael Rama.

Human gihatagan og letter of authority ang mayor sa City Council pinagulohan ni Bise Mayor Edgardo Labella, katulo na na-postpone ang bidding diin una kining gi-schedule atong Enero 23, nauswag sa Pebrero 8 ug ikatulo kagahapon. (PAC)