Nasubo karon ang lesbian gay bisexual transgender (LGBT) community sa Sugbo sa kamatayon sa usa sa ilang mga miyembro sa sitio Babag 2, Barangay Babag, Siyudad sa Sugbo.
Kagahapon sa buntag napalgan nga patay si Reymund Mabini, 25, tinun-an sa Cebu Technological University (CTU) sa Barangay Babag.
Matod ni Police Staff Sergeant Mark Daclan, imbestigador sa Mabolo Police Station, ila pang gisubay kon aduna bay foul play ang kamatayon ni Mabini.
Napalgan ang iyang lawas sa lawom nga dapit diin didto mopagawas sa ilang hugaw ang kasagaran sa mga residente nga way kasilyas.
Aduna kini samad sa ulo nga posibleng tungod sa iyang pagkatagak gikan sa ibabaw sa pangpang.
Duna usab siyay mga garas-garas sa kalawasan.
Naa na sa ubos sa iyang tuhod ang short pants ug brief ni Mabini, apan wala silay nakita nga timailhan nga adunay gihimong dautan.
Apan wa usab nila wad-a ang posibilidad nga gibinoangan si Mabini og tawo.
Way bisan usa ka residente sa dapit nga pulos ra usab iyang mga kabanay ang nakadungog nga adunay misinggit nga nangayog pakitabang niadtong Lunes sa gabii, Abril 23, dihang nag-brownout.
“Nagpaabot pa mi sa autopsy kay basin natagak lang ni or unsa ba or basin gituyo ug gibinoangan ni ang biktima maong na slide siya didto,” matod ni Daclan.
Hustisya
Sa Facebook account sa biktima nga nagdala sa alyas Rica Reyes, nagbaha ang panawagan alang sa hustisya sa iyang kamatayon.
Wa sila magtuo sa gidangatan ni Mabini nga ilang gihulagway nga buotan ug daghang higala sa eskwelahan.
Awhag sa Mabolo police station sa mga nakakita kon gipatay si Mabini nga labing maayo moduol silag opisyal sa barangay aron mahatagan og hustisya ang kamatayon niini.
Si Nica Caballero, magtutudlo sa Asian College of Technology (ACT) nipagawas sa iyang kasubo sa pagkamatay ni Mabini sanglit iya ning tinun-an sa grade 11 sa maong tunghaan.
Matod niya nga buotan nga sa pagka tinun-an si Mabini.
“Siya ang isa ka studyante nga dili mauwaw kon unsa siya gikan. At the same time hardworking, determined ug trustworthy,” paghulagway ni Caballero kang Mabini. (AYB)