HUMAN siya masayod nga init nga pulitikanhong panagribal sa iyang lungsod nakapaislag sa mga investtor ug turista sa San Fernando, si Mayor Lakambini “Neneth” Reluya nihimog mga lakang aron pagpalambo sa kahapsay ug kalinaw.
Kini maglakip sa executive order nga iyang pagaumulon nga magdili na sa pagsul-ob bonnets o bisan unsang tabon sa nawong sa kadalanan hangtod sa Hunyo 30.
Kini human ang mga lumolupyo sa lungsod gikatahong nakakuta og armadong mga tawo nga nagmaskara nga nagbahisbahis sa lungsod sukad gisugdan ang campaign period.
Atol sa tigom sa Peace and Order Council sa lungsod sa Martes, Abril 23, si Reluya niingon nga ang init nga panagribal tali kaniya ug kang mayoral candidate Ruben Feliciano nakadaut sa mga lumolupyo ug patigayon.
Si Filomeno Leyson, Purok president sa San Fernando ug supporter ni Reluyta, niingon nga siya personal nga nakadawat og daghang mga hulga, labina sa grupo ni Feliciano, nga siya mamatay kon di mobiya sa lungsod.
Iya na kining gitaho ngadto sa kapulisan, apan way gihimong igong lakang aron mahunong ang mga pagpanghulga.
Si Violy Musngi, sakop sa Chamber of Commerce sa San Fernando, niingon nga ang mga tag-iya sa usa ka pabrika sa semento sa South Poblacion wa na moanha sa lungsod tungod aron pagduaw sa planta sukad sa mga pagpamatay sa mga opisyal sa lungsod. (JKV sa SunStar Cebu)