SECTIONS
Tuesday, July 23, 2019
SUPERBALITA CEBU

Jaclupan dam mihubas

DESILTING: Ang Metro Cebu Water District (MCWD) mipahigayon na og desilting sa Jaclupan dam tungod sa paghubas na sa tubig. Pinaagi niini, mobalik paglawom ang dam kon moabot na ang ting-uwan ug mobalik sa normal ang tubig sa dam. (Herty B. Lopez)

USA ngadto sa duha ka oras na lang ang agas sa tubig sa pipila ka mga konsumidor sa Metropolitan Cebu Water District (MCWD) karon nga anaa nalang sa 9,000 cubic meters matag adlaw ang ma-supply sa Jaclupan Dam.

Hingpit nang nahubas ang infiltration basin sa Jaclupan Facility, diin atol sa pagbisita sa Superbalita Cebu sa dapit, gisugdan na ang desilting kun pagkubkob sa bas tungod kay niuga na ang yuta nga nitabon sa infiltration basin.

Ang infiltration basin maoy mosala sa tubig nga gikan sa sedimentation basin kun pundohan sa tubig gikan sa Mananga River.

Lakip sa apektado mao ang mga pasaka ug sudlunon nga mga dapit sa Talisay City, ug mga barangay sa Dakbayan sa Sugbo nga naglakip sa Bulacao, Inayawan, Cogon Pardo, Kinasang-an, Basak San Nicolas, Basak Pardo, Mambaling, N. Bacalso Ave., Sawang Calero, Suba, Pasil, San Nicolas proper, Pahina Central, Kalubihan, Sanciangko, Colon, Kamputhaw, Sto Niño, Pari-an, San Roque, Tinago, Kamagayan, Tejero, T. Padilla, Tisa, Punta Princesa, Labangon, Banawa, Salvador, Katipunan, Capitol Site, Oprra, Calamba, Sambag 1, Sambag 2, ug Sta Cruz sa Cebu City.

Matod sa tigpamaba sa MCWD Charmaine Rodriguez-Kara, nagdahom sila nga molahutay ang Jaclupan Facility ngadto sa uwahing bahin sa Mayo o sayo sa Hunyo, apan posible nga kutob nalang karong Abril kon basehan ang gidaghanon sa tubig.

Ang Jaclupan Facility nalang ang surface water source sa MCWD sa habagatang bahin sa Sugbo human nahubas ang Buhisan Dam.

Mikunhod

Kon normal pa ang lebel sa tubig, maka-supply pa ang Jaclupan og 33,000 cubic meters matag adlaw.

Apan karon nga mitibugsok ang kapasidad niini, nagpasabot nga moabot sa 24,000 ka mga panimalay ang apektado sa pag-ubos sa supply.

“Pasabot ana ang katong mga areas nga gisupplyan which is from Talisay City to Central Cebu City mo lower ang ilang service hours. Kung sauna makaagas sila og 3-5 hours mosamot gyud siya og kaubos, to 1-2 hours nalang per day,” si Kara nagkananyon.

Matag balay gibana-banang mokunsumo og usa ka cubic meter nga tubig matag adlaw.

Hinuon kon hingpit na nga mahubas ang Jaclupan Dam, ilang pun-an ang ilang gikuha nga supply sa ilang bulk supplier aron masiguro nga makaagas gihapon ang mga apektado nga konsumidor.

Usa sa buhaton sa MCWD kining pagdugang og supply gikan sa ilang bulk supplier sa Mambaling ug lungsod sa Carmen.

Nibutang na usab sila og booster pump sa Carreta Cemetery aron moabot ang tubig ngadto sa sakaon nga mga dapit sa norte sa Dakbayan sa Sugbo.

Giangkon usab ni Kara nga adunay mga dapit sa ilang service area nga wa na makaagas, lakip niini ang sakaon nga mga dapit ug mga anaa sa sudlunon.

Padayon ang awhag sa MCWD sa ilang konsumidor nga magdaginot sa tubig karong panahon sa ting-init nga nagkanihit ang supply.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph