Pulis: Cardiac arrest hinungdan sa kamatayon sa LGBT member

CARDIAC arrest ang gikamatyan sa miyembro sa lesbian, gay, bisexual, and transgender (LGBT) sa Sitio Babag 2, Barangay Babag, sa siyudad sa Sugbo, niadtong Martes sa buntag, Abril 23.

Matod ni Police Major Dindo Alaras, ang hepe sa Mabolo Police Station, nga migawas na ang resulta sa autopsy sa patayng lawas ni Raymond Mabini 25, nga molopyo ra usab sa maong lugar.

Atake sa kasing-kasing ang nakitang hinungdan sa Philippine National Police Crime laboratory sa kamatayon ni Mabini ug wala sila’y nakitang foul play.

Dakong samad sa agtang ang nakita sa medico-legal officer sa Crime laboratory nga gituohan nga na parok sa bato ang naangkon ni Mabini.

Ang ginikanan ni Mabini giingong mitug-an kini sa mga imbestigador sa Mabolo Police Station nga migawas kini sa balay Martes sa kaadlawon aron mo pagawas sa iyang hugaw sa dapit diin siya napalgan nga wala nay kinabuhi.

“Katong iyang samad sa ulo na mumo daw to kay natagak man siya,” matod ni Police Major Dindo Alaras.

Nagtuo si Police Major Alaras nga samtang mi-utong ang biktima didto na siya gi-atake sa kasing-kasing sanglit naa naman ang short pants ug brief niini sa ubos sa iyang tuhod.

Wala sab maka matikod ang mga silingan nga adunay misinggit nga nangayog pakitabang.

Naila usab ang maong mahuyang sa ilang dapit nga buotan ug walay gika-kontra nga tawo.

Bisan ang iyang mga kaila sa tunghaan diin siya nag eskwela pulos nakurat sa gidangatan ni Mabini nga naila sa iyang mga higala nga si Rica Reyes.

Aduna pa’y nanawagan og hustisya sa kamatayon ni Rica Reyes tungod kay dili sila maka dawat sa iyang kamatayon.

Tungod niini, gisirad-an na sa Mabolo Police Station ang ilang imbestigasyon sanglit wala na sila’y nakitang foul play sa maong kamatayon. (AYB)

Related Stories

No stories found.
SunStar Publishing Inc.
www.sunstar.com.ph