GIWALA sa Misamis Oriental Provincial Police Office ang motibo nga pulitika ang hinungdan sa pagpamusil patay kang Claver Miral, kapitan sa Barangay Napaliran, lungsod sa Balingasag, Misamis Oriental.
Kini ang gibutyag ni Police Colonel Rolando Destura, kinsa Misamis Oriental Provincial Police director, ug niingon nga duna sila dakong posibilidad nga anggulo sa kamatayon niini.
“Based on the result of initial investigation na alis na namin ang election related motive,” matud ni Destura.
Aduna na usab silay naila nga mga suspetsado apan sa pagkakaron kini pa lamang ang ilang mabutyag nga impormasyon aron dili mabalda ilang padayong imbestigasyon.
Gikondena
Subo sab kaayo ug hugot nga mikondena si Misamis Oriental Governor Bambi Emano sa kamatayon ni Miral kinsa gikonsidera niining kaalyansa kauban sa partido PaDayon Pilipino.
Si Miral gitaparan sa motorsiklo ug gipusil patay niadtong Domingo sa gabii, Abril 21, sa may Puntagorda, Barangay Hermano, Balingasag, Misamis Oriental.
Nanawagan si Emano sa hinanali nga resolusyon sa pagpusil-patay niini aron hingpit nga makab-ot sa biktima ug iyang pamilya ang tunhay nga hustisya.
Kahinumduman nga ang biktima naimbitahan sa usa ka birthday party nga gipahigayon sa usa ka hotel sa lungsod sa Jasaan ug pauli na sa Balingasag, apan pagdangat sa Puntagorda giingong gitaparan kini sa motorsiklo nga sakay duha ka suspek ug gipusil ug nagbuy-od sa kalsada sa dapit.