NANGHINAOT ang Archdiocese sa Cagayan de Oro nga dili mangdaot ang mga kandidato ilabi na ikatulo ug kataposang hugna sa ipahigayong candidate’s forum sa Little Theatre sa Xavier University, Corrales Avenue, dakbayan sa Cagayan de Oro.
Ipahigayon ang kataposang hugna sa Pag-ila sa Lihuk Movement 2019 karong umaabot nga Martes, Abril 30, alang sa mga nagpapili sa pagka mayor ug bise mayor sa dakbayan sa Cagayan de Oro.
Nanghinaot si Rev. Fr. Satur Lumba, social action center director sa Archdiocese, nga unta makatutok lamang ang mga kandidato sa ilang mga tumong sa paglansad sa umaabot nga eleksiyon ug dili ang mga pagpangdaot sa isigka-kandidato.
“Ang pagdaot nato sa usa ka kandidato makahatag og dili na hinuon maayo nga impression sa mga mamotaray,” matud ni Lumba.
Gidugang pa niini nga nakita man usab ang kalamboan sa ikaduhang hugna diin walay pagpangdaot ug pag-initay nga nahitabo ug nanghinaot nga mas hapsay ug maplastar pa ang kataposang hugna.
Samtang gidugang usab ni Nestor Banuag Jr., lead convenor sa Lihuk movement ug National Citizen’s Movement for Free Elections provincial coordinator, nga ang katawhan na ang maghukom kung unsa man ang ilang mga nakita.
“Consistent mi sa amoang ginaplastar nga mechanics, sistema, ground rules, house rules unsa may inyong nakita nga na-igo sa camera ang mga tawo kamo ang pwedi nga mohukom niana,” matud ni Banuag.
Giingong gihimo lamang niini nga madunggan sa katawhan ang mga tubag sa mga kandidato sa mga isyu ug pangutana nga gikan usab sa katawhan ug andam kini nga modumala diha ilabi na kung init na ang mga hisgutanan ug magtutok sa tumong niini ug dili magdagkot diha sa kainit sa diskasiyon.
Kahinumdoman nga kumpara sa unang hugna nag-viral ang usa ka video diin gisiko ni Jocelyn “Bebot” Rodriguez si Konsehal Ian Mark Nacaya kinsa pulos nagpapili sa pagkakonsehal sa siyudad.