PATAY ang usa ka priso nga gikan gipa-drug test sa Philippine Drug Enforcement Agency (PDEA)-Northern Mindanao human mi-ambak sa hagdanan.
Giila ang priso nga si Regie Reyes, taga Igpit, lungsod sa Opol, Misamis Oriental kinsa nag-atubang og kasong murder.
Si Reyes humana nakuhaan og test ug palakaw na unta niadtong tungura sa buhatan sa PDEA nga dunay duha ka mga escort.
Giingong miambak si Reyes ug ulahi na nga nagunitan sa mga escort hinungdan sa pagkahulog ug pagkapakong sa ulo nga maoy gituohang hinungdan sa iyang kamatayon.
Si Maricris Mulat, bag-ong assistant jail warden sa Misamis Oriental Provincial Jail (MOPJ), niingon nga tulo ka mga jail guard ang miuban ni Reyes paingon sa buhatan sa PDEA-Northern Mindanao human ilang nadesisyonan nga ipaubos sa drug test dihang namatikdan nga mura og wala na kini sa iyang kaugalingon.
Giingong lima na ka tuig kining napriso sa kasong murder ug gituohang na depressed kini. Tumong sa pagpa-drug test niini aron masuta kon basin epekto kini sa ginadili nga druga.
“Atong purpose sa pagpa-drug test kay kon mag-positive sa druga maghimo mi og anti-drug operation sulod sa atong jail kay basin naay nakasulod ug kung negative pod amo siyang marekomendar sa psychiatrist ug matambalan gyod siya,” pasabot ni Mulat.
Nasayran nga kanunay mosulti si Reyes nga gusto na siyang mamatay.
Gani duha nalang unta ka bulan nga makagawas na kini sa prisuhan.
Sa pagkakaron, nanawagan si Mulat sa pamilya sa biktima nga kuhaon ang patayng lawas labina na taod taod na nga walay nagbisitahan niini.
Giatiman na sab ang iyang patayng lawas sa MOPJ ug anaa karon sa Everlasting Funeral Homes.