WALA ang presensiya sa duha ka mga nagpapili nga kongresista sa ikaduhang hugna sa candidate’s forum sa Lihuk movement sa Little Theater sa Xavier University, Corrales Avenue, dakbayan sa Cagayan de Oro, niadtong Martes, Abril 23.
Sila Association of Barangay Councils president Yan Lam “Alam” Lim sa ikaduhang distrito ug si Rolando “Klarex” Uy sa unang distrito ubos sa partido sa Partido Demokratiko Pilipino ug kaalyado ni Mayor Oscar Moreno wala nakita niadtong higayona.
Samtang anaa sila si Rofus Rodriguez ug Engr. Roger Villazorda sa ikaduhang distrito ug sila usab Caesar Ian Acenas ug lawyer Gil Banaag sa Partido Federal ng Pilipinas sa unang distrito.
Sa pakighinabi kang Nestor Banuag Jr., lead convenor sa Lihuk movement ug National Citizen’s Movement for Free Elections (Namfrel) provincial coordinator, gibutyag niini nga taud-taud na nila nga gipadalhan og imbitasyon ang maong mga kandidato.
“Not bad kay gusto ta nga maminaw og lain-lain nga mga opinyon gikan sa kandidato nga nagpapili at least ni more than one kita pero mao lage to it’s not new experience kay last forum di man sad kumpleto,” matud ni Banuag.
“Silang duha nag send man sad og ilang communication, Klarex Uy, Alam Lim kay dili maka apil kay naa sila’y conflict nga shedule sayang kay dugay na nga invitation nice unta nga opportunity,” dugang niini.
Malampuson
Bisan pa man nga dili kompleto ang mga kandidato sa pagkakongresista gikonsidera nga malampuson ang candidate’s forum tungod duha lamang ang wala makaabot.
“Unom sila tanan duha ray wala so 75 porsiyento ang ilang attendance in short majority sa first ug second district nanunga para sa ako succesful gihapon ang forum nato,” matud ni lawyer Ramil Acol, City Commission on Elections officer.
Samtang si Rev. Fr. Satur Lumba, social action center director sa Archdiocese, nibutyag nga nalipay kini gumikan kay walay pagdinaotay atol sa maong forum ug mga isyu lamang ang gipanghisgotan kumpara sa naunang hugna. Nasayangan usab kini sa mga wala nakatambong gumikan kay sayang ang maong oportunidad.