Tres ni Lillard mipatay sa OKC

NAGPABUTO og 37-foot three-point bomb si Damian Lillard sa nahabiling 0.4 segundo aron agakon ang host Portland Trail Blazers ngadto sa kadaugan batok sa Oklahoma City Thunder, 118-115, sa Game 5 nga maoy naghuman sa ilang 1st round series, 4-1, kagahapon sa NBA 2019 Playoffs.

Sa pagsugod pa lang, nanginit nang daan ang mga kamot ni Lillard ug gihuman niini ang duwa nga adunay 50 puntos lakip na niini ang 10 ka three-point shots, nga maoy bag-ong franchise record sa Trail Blazers.

Gikan sa 115-115 nga panagtabla, si Lillard midala sa bola ug dihang milapas kini’g gamay sa halfcourt, kalit kining miitsa sa nakapadaog nga tres. Human niini, milanog ang abiba nga “MVP! MVP!” sa mga tumatan-aw nga gipahinungod ngadto kang Lillard.

Ang Trail Blazers ming-abante sa Western Conference semi-finals diin ilang ikaharong ang modaog sa 1st round series tali sa Denver Nuggets ug San Antonio Spurs.

Ang Thunder gipangulohan ni Russell Westbrook pinaagi sa iyang 29 puntos, 11 rebounds ug 14 assists nga maoy iyang ika-10 nga triple-double ning maong season samtang si Paul George mikulit og 36 puntos.

Nuggets 108, Spurs 90

Sa Denver, nimugna og 23 puntos si Jamal Murray aron agakon ang host Nuggets ngadto sa kadaugan batok sa San Antonio Spurs sa Game 5 aron pagposte og 3-2 nga bintaha sa ilang 1st round series sa Western Conference.

Ang Nuggets aduna pa’y laing lima ka mga magduduwa nga ningmugna og dobleng numero nga mga puntos.

Ang Spurs gipangulohan nila ni LaMarcus Aldridge ug Demar DeRozan pinaagi sa ilang 17 puntos matag usa.

Raptors 115, Magic 96

Sa Toronto, nakaabante sa semi-finals sa Eastern Conference ang host Raptors human nila gipangkawras ang Orlando Magic sa Game 5 nga maoy naghuman sa ilang 1st round series, 4-1. Gipangulohan ni Kawhi Leonard ang kadaugan pinaagi sa iyang 27 puntos samtang nitampo og 24 puntos si Pascal Siakam.

Ang Magic gipangulohan ni D.J. Augustin pinaagi sa iyang 15 puntos.

76ers 120, Nets 100

Sa Philadelphia, nakaabante sab sa Eastern Conference semi-finals ang host 76ers human nila gipalagpot ang Brooklyn Nets pinaagi sa dakong kadaugan sa Game 5 nga nakahuman sa ilang 1st round series, 4-1.

`Sa conference semi-finals, makigparang ang 76ers batok sa Raptors. Gipangulohan ni Joel Embiid ang 76ers pinaagi sa iyang 23 puntos ug 13 rebounds. (AP, ESL)