TALIWALA ning nagpadayon nga 1st level, ang PowerPlay basketball training camp nga gipahigayon sa tulo ka managlahing dapit, andam na usab nga manawat og rehistranti og mga estudiyante alang sa ilang second level.
Kini maoy gipahibawo ni Larry Villanil, ang kanhi Barangay Ginebra player sa PBA kinsa maoy nagsilbing training director sa nahisgutang camp.
Sa kasamtangan, ang inadlawng session sa PowerPlay gipahigayon sa Lapu-lapu City City basketball court (duol sa Birhen sa Regla church), diha usab sa Ibabao-Estancia, dakbayan sa Mandaue ug ingon man sa Barangay Gabi gym sa lungsod sa Cordova.
Sugdan ang ilang second level karong Mayo 1, adlawng Miyerkules.
Si Villanil kinsa kanhi usab assistant coach sa Cebu Gems sa nabungkag na nga Metropolitan Basketball Association (MBA), mipadayag nga ang training camp modawat sa mga bata nga nagpangidaron og 7 ngadto sa 18 anyos.
Itudlo sa mga kabataan mao ang basic training sa basketball nga naglakip sa pagpasa, pagdepensa ug pag-itsa.
Alang sa dugang detalyi, mahimong motawag o mo-text sa 0922 290 2129 o sa telepono 495-5499. (PR)