YANONG girehistro sa Barangay Tungkil ang ilang ikaduhang kadaugan sa nagpadayon nga 2019 Minglanilla Mayor’s Cup Summer League basketball tournament 21-under category pinaagi sa paglubong sa Ward 3, 101-81, nga gipahigayon niadtong Martes sa gabii sa Minglanilla Sports Complex.
Si Jules Langres, sakop sa University of San Carlos (USC) Warriors, maoy nangulo sa Tungkil nga may 26 puntos nga giabagan og 15 ni Bryle Sanchez ug 10 puntos usab gikan ni Kyle Basanon.
Tataw nga mipahimulos sa ilang bintahan, nagsugod sa ilang dominasyon ug mipabingat sa ilang labaw ang Tungkop sa third quarter ug fourth quarter aron pagsiguro sa kadaugan.
Si Jose Miguel Largo mitali og 22 puntos, 19 gikan ni Spencer Gilbuena alang sa napukan nga Ward 3.
Samtang sa 17-under, gipukan usab sa Pakigne ang Ward 2, 86-74, samtang sa Open division, nakaipsot ang Barangay Tulay sa uwahing pagpanghudlat sa Tungkil, 85-80, aron usab sakmiton ang ilang ikaduhang sunodsunod nga daog.
Gladilo Ygay mipakatap og 23 puntos, midugang og 11 si Angelo Romarate samtang 10 usab ang natampo ni Adrian Mayordo alang sa maong kadaugan.
Si Ramil Guevarra mipakli og 20 puntos, Maglasang 19 ug 12 ang nakolekta ni Archie Pepito alang sa Tungkil nga nahagsa ngadto sa 1-1 nga baraha.
Ang tinuig nga torneyo nga gitumong aron pagpalambo sa natad sa paugnat sa kusog sa maong lungsod, giabagan usab sa Sangguniang Kabataan Federation (SKF). Gawas sa basketball, aduna usay volleyball competition. (JBM)