SUWAYAN paglangkat sa defending champion San Miguel Beermen ang unang lingkuranan sa finals sa ilang pagpakigbatok og balik sa Phoenix Pulse Fuel Masters sugod karong alas 7:00 sa gabii sa Game 5 sa ilang semi-finals series sa PBA 2019 Philippine Cup sa Cuneta Astrodome.
Ang Beermen, nga nagtinguha sa ikalima nilang sunodsunod nga Philippine Cup title, ninglampaso sa Fuel Masters, 114-91, sa miaging gabii sa Game 4 nga maoy naghatag kanila og dominanteng 3-1 nga bintaha sa best-of-seven semi-finals.
Ning kombatiha, gilauman nga ipagawas sa Fuel Masters ang tanan nilang makaya aron makakita pa og laing pagsidlak sa adlaw.
Apan ang determinasyon sa Beermen nga humanon og sayo ang series seguradong makahatag og tumang kalisod sa Fuel Masters.
“I think mahirap na iyon, 3-1, although their chance is still there,” matod ni Beermen coach Leo Austria sa PBA.PH.
“Mentally, we have to be tougher because this (Game 5) will not be an easy game. We will work really hard in the next game because we don’t want to extend the series. It’s not going to be easy because their conference is on the line.”
Si Fuel Masters coach Louie Alas mipasalig nga dili sila bastabasta moisa sa ilang puti nga bandera ug padayon silang mokombati kutob sa ilang makaya.
“We will not give up. Ang sabi ko nga sa kanila, kung me plano kayong mag-bakasyon ako last thing na gagawin ko dito is mag-give up, hangga’t di natatapos ito,” matod ni Alas.
Sa 18 ka mga higayon nga nakaposte og 3-1 nga bintaha ang Beermen sa usa ka series, kausa ra sila napakyas ug 12 ka mga higayon ilang nahuman ang series sa Game 5.
Gikan sa ilang pagsulod sa liga, sulod sa upat ka mga higayon nga nakasagubang og do-or-die playoff game ang Fuel Masters, tanan pulos sila pakyas. (ESL)