Sugilanon: Ang abat nga mihilak

LABIHAN ang gibating kalisang ni Israel ning gabhiona dihang nahiagi siya sa baga nga katubhan. Gikan siya namisita sa usa ka dalaga sa pikas baryo. May nakita siya ug nakaseguro siya nga abat gayud ang iyang nakita, kay siga kaayo ang mga mata niini ug nagsigeg katawa. Giuyog pa niini ang punoan sa tisa diin kini nagtungtong. Sa ubos sa punoan may kandila nga bag-o lang gidagkutan ug giugbok. Midagan si Israel sa tumang kalisang. Karon ug unya mapandol siya sa nag-igdal nga mga bato sa dalan samtang nagdagan.

Mihangak siya ug naminti. Ngitngit kaayo ang palibot.Ingon sa dili siya makatuo sa iyang nakita tungod kay wala pa maabaniog sa tibuok dapit nga may abat nga mangatang og mga tawo sukad sa pagkamatngon niyag buot. Apan ning gabhiona nakita sa duha niya ka mata ang abat nga naghukas sa iyang kamisin ug purol.

Niadtong miaging Sabado human sa iyang trabaho ug human madawat ang iyang suweldo isip pahinante sa gamay nga kompaniya sa dakbayan sa Mandaue, midiretso si Israel og pamisita sa balay nilang Leonora, ang babaye nga natingban sa iyang pagmahal. Pag-abot niya sa balay nilang Leonora iyang nakita si Estoy, karaang bugoy sa ilang dapit sa baryo Kanturaty. Misantop sa hunahuna ni Israel ang ilang panag-ribal sa gugma ni Leonora. Naseguro niya ang kagubot. Gibali og kabalaka si Israel ning higayuna. Nasayod siya kon unsa ang pagka tawo ni Estoy. Daghan kinig gipaluhod nga iyang gikaaway. Dili niya pasayluon. Makatilaw gyud sa iyang kabangis.

Pagkasayod ni Estoy nga si Israel iyang karibal, mihangad kinig sumbagay sa naulahi. Apan wa mosukol si Israel. Dili siya gustog kagubot, ilabi na nga ulipon na si Estoy sa ilimnong makahubog. Apan usa ka higayon dihang nagpaingon na si Israel sa iyang trabahoan, giatngan siya ni Estoy ug mihagad kang Israel og sumbagay. Nagharong sila. Miuna pagsuntok si Estoy apan nakalihay si Israel. Mibalos pagsuntok si Israel ug naigo si Estoy sa apapangig ug nasarasay ug maayong pagkatugsaw sa dakong kanal.

“Pagabayran mo kining gibuhat mo kanako!” matod ni Estoy. Dali kining nagpahilayo nga nagpangwilik sa mga lapok sa iyang kalawasan.

Misuot si Israel sa baga nga kakahuyan aron paglikay sa makalilisang nga abat. Niadtong miaging adlaw nakita niya kini dihang namisita siya kang Leonora. Nakita niya nga nagbarog kini sa punoan sa kahoy nga Tisa. Giuyog pa ang punoan ug nagsige og katawa, samtang sa ubos sa punoan dunay nanagsigang mga kandela. Dako ang pagtuo ni Israel nga duna gyuy nagbinuang kaniya. Karon gusto niyang mahibaw-an kon kinsa kini. Wa niya damha nga miabot na diay siya sa sementeryo sa iyang pagdagan Duol ra kini sa nahimutangan sa naghubo nga abat nga nabatyagan niya nga nag-brip lang kini. Milipot siya sa luyong bahin sa punoan sa Tisa diin nagbarog ang abat. Misiga ang iyang mata. Nabantang sa iyang panan-aw ang pamayhon ni Estoy nga nadan-agan sa kahayag sa mga kandela. Nakita ni Israel nga may karsones ug kamisin nga gisab-it sa sanga sa bayabas. Nagtuo siya nga kang Estoy kini. Iya kining gikuha.

Unya kalit milanog sa lawom nang gabii ang sagunson nga pag-uwang sa mga iro gikan sa ‘amplifier’ nga giandam ni Israel kaganina aron paghadlok sa abat.

Sa pagtuo ni Estoy nga tinuod ang iyang nadungog nga uwang sa mga iro, kalit siyang miambak sa tumang kalisang. Gipangita niya ang iyang mga sapot, apan wa na kini didto sa sanga sa bayabas. Mikaratil siya pagdagan nga nagtapis na lang og unas sa saging samtang nagsampong sa iyang mga itlog. Unya mitiyabaw siya paghilak. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph