NAGSUWAT ko ani nga kolum nga nagkutoy ang tiyan. Disisays na ka oras nga wa koy kaon.
Dili sa ingon nga labihan na nakong pobreha nga wala na koy ikapalit og bugas. Tinuyo ni nako nga di mokaon sulod sa disisays ka oras kay mao ni akong gigamit nga eating pattern sa dugay na nga panahon. Gamiton nako ang nahabiling walo ka oras isip panahon sa pagkaon.
Mao ni gitawag sa iningles og ïntermittent fasting. Fasting, kon sa Bisaya pa, puasa. Intermittent, kon sa Bisaya pa, putol-putol, dili diretso. Ang intermittent fasting diay putol-putol nga puasa.
Ingon ini ni. Adunay baynte-kwatro ka oras ang usa ka adlaw. Kon mag-intermittent fasting ka, mogahin kag pila ka oras nga way kan-anay, tubig lang, tsaa o kape. Importante nga mas taas ang panahon sa pagpuasa kaysa panahon nga gigahin sa pagkaon.
Sa akong bahin, akong gigamit ang 16/8 intermittent fasting. Dili ko mokaon sulod sa disisays ka oras. Adto na ko mohabhab sa nahabilin nga walo ka oras.
Ingon ani akong adlaw. Dili ko mamahaw. Inig mata nako, manghuyatid lang ko ug manghimota. Mokaon ko ari na sa alas dose sa udto. Human sa paniudto, naa pa koy hangtod alas otso sa gabii nga pwede pa nga mokaon.
Mao ni gitawag nakog window time for eating. Mokaon ko bisag kanus-a basta sa sulod lang ining walo ka oras. Sunod na pud nako nga kaon sa alas dose sa udto na sa sunod adlaw. Pasabot, nagpuasa ko sulod sa disisays ka oras, apil na ini ang mga oras sa gabii nga ako natulog.
Nag-intermittent fasting ko sulod na sa disiotso ka tuig. Pagsugod nako, wa koy kalibotan nga nag-intermittent fasting na diay ko. Nagsugod ni niadtong gihimo ko nga editor sa Sunstar. Mosulod ko sa trabaho hapon, ug mouli sa balay tungang gabii na. Usahay, kay laagan man, mabuntagan.
Matulog ko kasagaran ari na sa kadlawon. Inig mata nako, udto na, ug maniudto na lang pud ko diretso. Hangtod nga naanad ko nga way pamahaway.
Ning bag-o lang, nag-research ko og mga eating habits nga makaayo sa lawas. Kini laging magkaedad na ta. Ug didto nako nahibaw-an nga ang akong gibuhat intermittent fasting na diay.
Daghang kaayohan ang mahatag sa intermittent fasting. Apil na ini ang pagmentinarsa imong timbang. Mao tingaling gamay lang gihapon ko hangtod karon samtang ang akong mga ka-batch sama nag mga building sa IT Park.
Makapangutana ka: nganong makaayo man ang fasting? Gidid-an man gani nimo imong lawas og pagkaon, makaayo na hinuon? Ato ning tubagon sa sunod nga kolum.
Dinhi lang sa ta kutob kay pwerte na gyong gutoma di na nako maklaro ang meeeggdfv grghwna rgrwghjfsssag...