NING nagkaduol nga mga adlaw sa piniliay nga gikatakda karong Mayo 13, nisamot og kainit ang dagan sa pulitika sa lungsod sa San Fernando.
Duna nay mga mahulagway nga naghatag og timailhan sa posibling pagtumaw sa kagubot atol na unya sa adlaw sa eleksiyon.
Sigon sa mga nanggawas nga mga taho nga nagpadayon karon sa maong dapit ang pagbahis-bahis sa mga armadong mga tawo nga nakapabaton og kabalisa sa mga molupyo.
Kaniadto pa, pipila ka adlaw gikan sa pagkamatay sa bana ni Mayor Lakambini “Neneth” Reluya nga si Ricardo “Nonoy” Reluya Jr., kinsa mao usab ang ABC president ug kapitan sa Barangay Panataran, nakadawat na kita og mga huhungihong nga dunay mga wa mailhing estranyo nga nagpaso-paso sa kadalanan ug sudlonon nga mga lugar sa maong lungsod nga nagpaka-aron ingnon kunohay nga namaligya.
Tungod niini, naobserbahan na karon nga sayo sa kagabhion momingaw na ang maong lungsod ug pipila na lang ang magtikawtikaw tungod sa kahadlok.
May kolor man sa pulitika o wala, angay kining hatagan og aksiyon sa atong mga tinugyanan sa balaod nga dili na lang mohuwat pa og dunay moreklamo.
Prayoridad ug obligasyon sa atong kapulisan ang pagprotehir sa mga tawo.
Dili usab halayo ang mga pangagpas nga kining kahadlok karon sa mga San Fernandohanon tungod sa sunodsunod nga mga patay sa pipila nila ka mga official nga gialegahang nalambigit sa gidiling drugas, gisakyan o gipahimuslan og mga pulitiko.
Kini maoy dakong hagit ni Police Major Lymel Pasquin, hepe sa San Fernando Police, kay kon mapakyas sila sa pagpahibalik sa kahapsay ug kalinaw sa nahisgutang lungsod, basin baya simbako og matinuod ang mga pagduda nga mahimong madugoon ang eleksiyon sa maong lungsod.