NAGKADUOL na ang adlaw sa eleksiyon ug gibati na sa ubang kandidato ang kabalaka kay daw naglatay sa lugas sa lanot ang ilang kadaugan ug mora’g bangag sa dagom ang gikihanglan nilang lutson.
Sa akong pagsubaysubay sa kadalanan akong nakita ang poster sa mga kandidato diin ang uban wa na mahimutang sa mga dapit nga giingon sa Commission on Election (Comelec) nga common poster areas samtang ang uban makadaghang higayon na nga gisapawan sa poster sa laing kandidato.
Dunay uban nga maglibog ka kinsa ba gyud ang kandidato kay nawong sa amahan ug anak ang nakabutang tungod sa mga kandidato nga nagdala-dala pa sa pangalan sa iyang amahan nga diay iyang gipulihan kay nahurot na ang tulo ka termino.
Makapangutana ka unsa ba gyud ang naa sa politika nga dili naman buot magpailis ang mga nakahupot sa puwesto kay daw usa ka prangkisa na kini sa ilang pamilya.
Sa akong yanong pagsabot, kulang pa sa kaisog ug dili makabarog sa ilang kaugalingong tiil kining mga kandidatoha kay magpaagakay pa man sa ilang mga ginikanan. Sa yanong sinultihan wa pa sila malutas.
Ang mga bag ong napusa nga pawikan duna man gani kaisog kay bisan sa ilang kagagmay moadto gyud sa lawod nga maoy ilang pinuy-anan ug biyaan ang dapit diin sila giitlog sa ilang inahan apan kining mga politiko kuno kinahanglan pa magpalaban sa ilang amahan sa ilang pagdagan.
Inyo bang pilion ang mga kandidato nga sa ilang pagdagan nagkinahanglan pa’g gabayan o mosulay na sad mo’g bag- ong mga kandidato nga sangunan diha sa inyong distrito?
Kong unsa man ang binuhatan o kinabuhi sa usa ka kandidato dako kini’g puntos sa pagdani sa katawhan aron siya botohan.
Dili na kuno magsuot og yellow nga sinina si Mar Roxas ug magpalayo sa grupo sa Otso Diritso kay mao kini ang nagdala’g demalas sa iyang pagpapili.
Dili man seguro ang kolor sa iyang sinina ang ginatan-aw sa mga tawo apan ang mga lama nga iyang gibuhat panahon sa iyang pagserbisyo sa kanhi administrasyon. Ang wa mahatag sa katawhan nga hinabang alang sa mga biktima sa bagyong Yolanda ug uban pa.
Ang punay nga pagbatikos sa kasamtangang administrasyon inay suportahan aron molambo maoy nahimong dakong babag nga kinahanglan ambakon sa mga kandidato sa oposisyon nga uban sa Otso Diritso o independete man. Daghan sab mga politiko ang nangambak gikan oposisyon ug karon kauban na sa administrasyon aron lang magpabilin sa ilang mga puwesto. Anad na ang katawhan kay normal kini panahon sa eleksiyon