NINDOT ang nahimong linugdangan sa kasaulogan sa kuwaresma dinhi sa dakbayan sa Davao sa milabay nga semana.
Sa kinatibuk-an, nagmalinawon ug hapsay ang tanan taliwala sa mga kabalaka nga dunay mosamok sa kasaulogan gumikan kay daghang tawo ang nagpunsisok sa mga simbahan.
Nagpakita kini nga ang Dabawenyos nagtinabangay aron nga mapabilin ang kahusay ug kalinaw sa siyudad.
Pasalamatan nato ang tanan gikan sa mga opisyal sa lokal nga kagamhanan, liderato sa Simbahang Katoliko, kasundalohan, kapulisan, barangay tanod ug tanang niabag sa pagbantay sa palibot aron nga ang tanang aktibidad sa mga parokya magmalampuson.
Gawas kanila, ato sab nga pasalamatan ang mga molupyo nga nisabot ug nitamod sa mga pahimangno sa mga awtoridad nga di magdala og mga backpack, dagkong bag, kahon ug uban pa samtang moapil sa mga kalihukan simbahan.
Nindot hunahunaon nga kitang tanan nagtinabangay alang sa kaluwasan sa matag usa sa tanan nga mga ilusad nga kalihukan dinhi sa dakbayan.
Kay so far, di lang ang Semana Santa ang atong gibantayan, bisan kadtong kasaulogan sa Araw ng Dabaw ug uban pang aktibidad, ato na kining gihimo dinhi sa siyudad.
Busa angay lang nga saludohan nato ang tanan nga nagpakita sa suporta ug pagsabot sa hugot nga seguridad nga gipatuman sa mga awtoridad.
Nakita man god sa katawhan sa Davao nga ang hugot nga seguridad alang man lang sab sa kaayohan natong tanan.
Molaum kita nga sa uban pang mga kalihukan dinhi sa Davao, ingon sab niini ang himuon sa matag usa aron mabatokan ang mga nagtinguha sa pagyagaw sa naangkon natong kahapsay ug kalinaw dinhi sa dakbayan.